पंथी नर्तक देवदास बंजारे के स्मृति म चालू होही राज्‍य पुरस्कार





27 दिसम्‍बर, 2016। छत्तीसगढ़ के पंथी नृत्य ल देश विदेश के मंच मन म प्रसिद्धि देवईया पंथी नर्तक स्व. देवदास बंजारे के स्मृति म छत्तीसगढ़ सरकार पुरस्कार करईया हे। ये घोषणा राज्य के पर्यटन अउ संस्कृति मंत्री दयाल दास बघेल ह करिस। बेमेतरा जिले के तहसील मुख्यालय नवागढ़ म गुरू घासीदास लोककला महोत्सव 2016 के शुभारंभ समारोह म मंत्री जी ह ये घोषणा करिन। समारोह म गिरौदपुरी धाम के जगतगुरू विजय कुमार गुरू मुख्य अतिथि के रूप म शामिल रहिन। पंथी नृत्य प्रतियोगिता के आयोजन राज्य सरकार के पर्यटन संस्कृति अउ पर्यटन विभाग अउ अनुसूचित जाति विकास विभाग कोति ले करे गए रहिस हे। प्रदेश के कई जिला ले अंदाजन 300 पंथी नृतर्क दल मन ये प्रतियोगिता खातिर अपन पंजीयन करवाये रहिन।



ये प्रतियोगिता के पहिली पुरस्कार के रूप म 1 लाख 51 हजार रूपया, दूसरा पुरस्कार के रूप म 1 लाख 1 हजार रूपया अउ तीसरईया पुरस्कार के रूप म 75 हजार रूपए देहे जाही। एकर अलावा प्रतियोगिता म शामिल जमो पंथी दल मन ल दू-दू हजार रूपया संत्वाना पुरस्कार घलव देहे जाही। संस्‍कृति संचालनालय के संचालक श्री मिश्र जी ह बताईन के प्रतियोगिता म शामिल दल मन म जउन उत्कृष्ट प्रदर्शन करहीं तेला चिन्हांकित करके संस्कृति विभाग पंथी नृत्य प्रदर्शन खातिर विदेश भेजही। ये कार्यक्रम के शुभारंभ समारोह म पर्यटन अउ संस्कृति मंत्री बघेल कहिस के छत्तीसगढ़ के विश्व प्रसिद्ध पंथी नृत्य के माध्यम ले गुरू घासीदास के सत्य अहिंसा के संदेश जन-जन तक पहुंचथे। प्रदेश म 18 दिसम्बर ले 31 दिसम्बर तक अलग-अलग जघा म परम पूज्य बाबा गुरू घासीदास जयंती समारोह के आयोजन करे जावत हे।





Post a Comment

0 Comments