शिक्षा अधिकारी अपन आफिस म करवावत हे टोना-टोटका



कथें के शिक्षा ले अंधविश्वास ह दूर हाेेथे, फेर जब गुरूजी मन के बड़का आफिस म माई मूड़ साहबेच ह अंधविश्वास के सहारा लेके आफिस म टोना-टोटका करवाही त शिक्षा के का हाल होही तउन ल आपे मन सोंच लव। खबर हे के ये बुता होवत हे महासमुंद के बीईओ आफिस म।

बीईओ साहेब हर-हमेसा विवाद म बने रहिथे
महासमुंद के खंड शिक्षा कार्यालय म पदस्थ बीईओ ह विवाद म बनेच रहिथें। पाछू दिनन शिक्षक (पंचायत) के वेतन भुगतान करे के एवज म पांच-पाच सौ रूपया रिश्वत लेहे के आरोप ले घिरे बीईओ साहब अब अपन कार्यालय म तांत्रिक बाबा के शरन म हाथ फैलाए दिखत हवय। येला लेके एक वीडियो सोशल मीडिया म जोरदार वायरल होवत हे। अपनी कुर्सी ले खड़े होके बीईओ साहब तांत्रिक बाबा ले टोना-टोटका करात दिखत हे।

वीडियो हो गए वायरल
जब सोशल मीडिया म ये वीडियो वायरल होईस तब छत्तीसगढ़ शासन के संसदीय सचिव रूपकुमारी चौधरी ह जिला शिक्षाधिकारी ल तलब करके मामलाा के जांच करराये अउ कथित अंधविश्वासी बीईओ के विरूद्ध दंडात्मक कार्रवाई करे के निर्देश दीस। बताथें के बीईओ के विरूद्ध गंभीर शिकायत घलव हवय जेखर जांच जिला प्रशासन द्वारा गठित कमेटी ह करत हे। शिक्षक मन के वेतन के भुगतान बर रिश्वत मांगें जइसे गंभीर शिकायत ले घिरे बीईओ ले जिला प्रशासन के आला अधिकारी गुसियात घलव रहिथें। तेकरे सेती हो सकत हे के मानसिक परेशानी के कारन उमन तांत्रिक ढोंगी के शरन गईन होहीं।

Post a Comment

1 Comments

  1. shakuntala sharma11 December 2016 at 04:45

    ए काय सुनत हावन भाई ! भारी अचंभा ए - शिक्षा अधिकारी हर, ढोंगी - तांत्रिक मेर, समस्या के समाधान खोजत हे। मंत्र + यंत्र = तंत्र । अब एक तरह से ए विधा के तंत्र विद्या के नामुसी होवत हे, एहर चिंता के बात ए । असल म परंपरा के तुलना म विवेक ल महत्व देना चाहिए, तभे हमला दिशा मिलही अउ हमर समस्या के समाधान घलाव निकलही ।
    .

    ReplyDelete