जनदर्शन म मुख्यमंत्री ले 1800 ले जादा मनखे मन करिन मुलाकात





डॉ. रमन सिंह ह 34 लाख के निर्माण कार्य के तुरंते दीस मंजूरी
दोरनापाल नगर पंचायत म जल्दी होही अधोसंरचना विकास के काम
कबीरधाम जिला के एक दर्जन गांव मन म सूखा के स्थिति म जनता ल मिलही राहत


रायपुर, 02 फरवरी 2017। मुख्यमंत्री डॉ. रमन सिंह ले आज इहां मुख्‍यमंत्री निवास परिसर म आयोजित ‘जनदर्शन’ कार्यक्रम म एक हजार 841 मनखे मन मुलाकात करिन। एमा ले करीब 1280 मन मुख्यमंत्री ले व्यक्तिगत तौर म मिलके अपन समस्या बताइन। एखर अलावा 74 प्रतिनिधिमंडल मन के 561 मनखे मुख्यमंत्री ले मिलिन। डॉ. सिंह ह जनदर्शन म पंचायत प्रतिनिधि मन के आग्रह म कई जिला मन म 34 लाख रूपया के सात निर्माण कार्य मन के स्वीकृति तुरते प्रदान करिस।


जनदर्शन म मुख्यमंत्री ह छत्तीसगढ़ के नक्सल हिंसा पीड़ित सुकमा जिला के दोरनापाल नगर पंचायत के प्रतिनिधि मंडल ल कई ठन अधोसंरचना विकास के काम जल्द मंजूर करे के आश्वासन दीस। डॉ. सिंह ले दोरनापाल नगर पंचायत के अध्यक्ष श्रीमती कोसी ठाकुर के नेतृत्व म मनखे मन के प्रतिनिधि मंडल हर मुलाकात करके उहां के सड़क, बिजली, पेयजल जइसे बुनियादी सुविधा मन बर ज्ञापन सौंउपिन अऊ बताइन कि ए सब्बो विकास काम म अंदाजन 75 लाख रूपए के लागत आही। मुख्यमंत्री ह उंखर ज्ञापन नगरीय प्रशासन अऊ विकास मंत्री श्री अमर अग्रवाल ल ये जम्‍मो काम जल्दी स्वीकृत करे के निर्देश के संग भेजवाईस। दोरनापाल नगर पंचायत अध्यक्ष हर मुख्यमंत्री ले उहां शॉपिंग कॉम्पलेक्स निर्माण बर घलोक ज्ञापन सौंउपिस। उमन ये ज्ञापन घलोक नगरीय प्रशासन अऊ विकासमत्री ल जरूरी कार्रवाई बर भेजवाईस।






ए मौका म मुख्यमंत्री ले कबीरधाम (कवर्धा) के लगभग एक दर्जन गांव के किसान मन के प्रतिनिधि मंडल हर घलोक मुलाकात करिन। उमन डॉ. सिंह ल बताइन कि कवर्धा तहसील के पनेका, बिरनपुर, लिटीपुर, खंडसरा, दुधिया, पेण्ड्रा, खैरा, बिसनपुरा अऊ दशरंगपुर संग कइ गांव मन म ए बार मानसून कमजोर होए के कारण सूखा के स्थिति बन गे हावे। भू-जल स्तर नीचे चल देहे हे। उमन मुख्यमंत्री ले ए गांव मन म करजा अऊ बिजली बिल म रियायत देहे के घलोक अनुरोध करिन। डॉ. सिंह हर उंखर ज्ञापन जिला कलेक्टर ल भेजके उन गांव मन म राहत उपाय बर प्रस्ताव जल्दी भेजे के निर्देश दीन। उमन किसान मन ल भरोसा दीन के सरकार ऊंखर संग हे अऊ ओ मन ल हर संभव मदद मिलही। बालोद जिला के ग्राम पंचायत सोरर (विकासखंड गुरूर) के प्रतिनिधि मंडल के आवेदन म मुख्यमंत्री हर उहां लइका अऊ युवा मन ल खेल सुविधा देहे बर मिनी स्टेडियम बनवाए के आश्वासन दीन। उमन प्रतिनिधिमडल के ज्ञापन जरूरी कार्रवाई बर पंचायत अऊ ग्रामीण विकास विभाग के अपर मुख्य सचिव ल भेजवाईन।





Post a Comment

0 Comments