आज अजीत जोगी गरजही सीएम रमन के जिला म





कवर्धा, 04 मार्च, 2017। छत्तीसगढ़ के पहिली मुख्यमंत्री अउ जनता कांग्रेस छत्तीसगढ़ (जोगी) के माई सियान अजीत जोगी शनिवार को कर्वधा जिला के कापा (खैरबना) म जनसभा ल संबोधित करहीं। कांग्रेस ले अलग होके नवा पार्टी बनाए के पाछू ये दूसर मौका ये जब अजीत जोगी मुख्यमंत्री के गृह जिला म जनसभा ल संबोधित करहीं। एखर पहिली अजीत जोगी हर मुख्यमंत्री के गृहग्राम ठाठापुर म अपन पार्टी के नामकरण करे रहिस। चुनाव आयोग के निर्देश के बाद ओ मन ल पार्टी के नाम बदलना परे रहिस फेर नवा पार्टी के गठन के पाछू ले सरलग कांग्रेस संग बीजेपी के पदाधिकारी मन अउ सदस्य मन के जकांछ म प्रवेश जारी हावय।
जकांछ के घोषणा के पहिलिच युवा कांग्रेस के अड़बड़ झन मन अजीत जोगी के संग होए रहिन। एखर बाद ले जकांछ म प्रवेश के दौर जारी हावय। सूत्र मन ले मिले जानकारी के अनुसार जिला म कांग्रेस अउ भाजपा दुनों राजनैतिक दल मन ले बड़का संख्या म पदाधिकारी जनता कांग्रेस म प्रवेश करत हावय। कापा म आयोजित जनसभा म कुछ बड़े नेता मन के नाम के घोषणा जनता पार्टी म प्रवेश बर करे जा सकत हावय।
होली के बाद जिला म रबेली, लोहारा अउ रेंगाखार जंगल म बड़का सभा के आयोजन के तैयारी हावय। बताथें के होली के बाद ए तीनों जघा मन म बड़का जनसभा होही, जेमां ए क्षेत्र के जनप्रतिनिधि अउ पदाधिकारी मन के जकांछ म प्रवेश के औपचारिक घोषणा करे जाही। एखरे संग ही इंदौरी अउ कवर्धा म घलोक जनसभा आयोजन के तैयारी करे जावत हे।





style="display:block"
data-ad-format="autorelaxed"
data-ad-client="ca-pub-3208634751415787"
data-ad-slot="1301493753">

Post a Comment

0 Comments