पुलिस हिरासत म युवा व्यवसायी के मौत

बलौदाबाजार, 10 अपरेल 2017। बलौदाबाजार म पुलिस हिरासत मं एक युवा व्यवसायी के मौत के मामला आघू आए हावे। इतवार को संझा व्यवसायी जसवंत सिंह सलूजा संग यातायात पुलिस के झड़प होगे अउ पुलिस वोला थाना ले आइस। जिहां ओखर तबीयत बिगड़ गए, पुलिस अस्पताल लेगिस। अस्पताल म डाक्टर मन ओला मृत घोषित कर दीन। 15 दिन बाद मृतक के बेटी के शादी होवैया रहिस हे। परिजन मन पुलिस पिटाई से मौत के आरोप लगावत हावे। ये घटना ले गुसियाये मनखे मन अस्पताल मं हंगामा अऊ चक्काजाम कर दीन।

एति एएसपी विमल बैस हर यातायात प्रभारी धीरज मरकाम समेत ड्यूटी म तैनात 5 पुलिस वाले मन ल निलंबित कर दीस। घटना के दंडाधिकारी जांच के आदेश दे गए हावे।

इतवार संझा करीबन 6.30 बजे हाईस्कूल चेक पाइंट तीर वाहन मन के जांच चलत रहिस। ए दौरान जसवंत ह बाइक से 3 सवारी नहकिस। ओला रोके म जसवंत अऊ पुलिस के बीच विवाद हो गीस। एखर बाद पुलिस जसवंत ल कोतवाली ले गे। रात 8 बजे ओखर तबीयत बिगड़ गे त पुलिस ओला जिला अस्पताल लेके पहुंचीस।

जिहां डॉक्टर मन जांच करे के बाद ओला मृत घोषित कर दीन। मौत के बाद परिजन मन हर जिला अस्पताल मं जमके हंगामा मचाइन। मृतक के बेटी काजल सलूजा हर पुलिस के पिटाई ले पिता के मौत होए के आरोप लगाये हावे। गुसियाये लोगन मन हर देर रात जिला अस्पताल के सामने चक्काजाम कर दे रहिन।

"वो युवक हर यातायात प्रभारी ले हाथापाई करिस त ओला थाना लाये गीस, जिहां ओखर तबीयत बिगड़ गे। एखर सूचना परिजन मन ल दे गीस। ओ मन दवइ लेके तको पहुंचिन जेला थानेच मं ओला देहे गीस। एखर बाद अस्पताल ले जाये गीस।"

-श्यामसुंदर शर्मा, एसडीओपी