रमन लाइस जनमन के बजट

रायपुर, 10, फरवरी 2018। मुख्यमंत्री डॉ. रमन सिंह ह आज अपन सरकार कोति ले विधान सभा म बजट पेस करिन। ये बजट म मोदी के मन माफिक किसान अउ कमजोर वर्ग के मनखे खातिर अड़बड़ अकन प्रावधान करे गए हे। आज विधान सभा म मुख्यमंत्री ह बताइस के राज्य म एसो किसानी ले आय म बढ़ोतरी 22.16 प्रतिशत होही अइसे अनुमान हे। उमन कहिन के हमन बछर 2018-19 बर 13480 करोड़ के कृषि बजट पेस करत हवन जे ह पाछू बछर ले 29 प्रतिशत जादा हे। एमा 20107 करोड़ बोनस अउ सिंचाई, सुविधा, कृषि केंद्र मन बर, 546 करोड़ फसल क्षति बर. आपदा म किसानों के मदद, 546 करोड़ 88 लाख सूखा राहत बर, 631 करोड़ सौर सुजला योजना बर, 2997 करोड़ कृषक ज्योति योजना बर, कृषक ज्योति योजना म 2997 करोड़ के प्रावधान करे गए हे। एसो 51 हजार सोलर पंप स्थापित करे के घलव प्रावधान हे अउ मुंगेली अउ भाटापारा म एग्रीकल्चर कालेज म स्नातकोत्तर कक्षा के संग 6 एग्रीकल्चर महाविद्यालय खोले जाही। अजा, अजजा ल ए साल ले कृषि पम्प के बिजली बिल ले पूरा छूट देहे जाही। ए साल 60 हजार हेक्टेयर क्षेत्र म सिंचाई क्षमता बढ़ाए जाही। येकर सेती 20518 करोड़ सिंचाई के विस्तार बर प्रावधान करे गए हे। धान खरीदी म घाटा अऊ आन खरचा बर 850 करोड़ रुपया के प्रावधान करे गए हे। ये बछर ले एक नवा योजना चलो गांव की ओर सुरु होवइया हे। अब गांव म पशु रेस्क्यू सेवा घलव शुरू होही। 
अपन जमीन म तालाब खोदके मछलीपालन बर एक नवा योजना म  3 करोड़ 15 लाख के प्रावधान करे गए हे। शक्कर कारखाना बर ऋण अग्रिम के प्रावधान करे गए हे तेखर बर 75 करोड़ के व्यवस्था करे जाही। सहकार के बढ़ोतरी खातिर अब जिला सहकारी बैंक मन के अपैक्स बैंक म विलय होही। मुख्यमंत्री ह कहिन के ये सब उदिम ले हमन किसान मन के समृद्धि के तार जोरे हवन। रमन सिंह ह किसान मन ल साधुवाद दीन के ओ मन अपन लगन से प्रदेश के विकास करिन।
प्रदेश के आन योजना मन म खाद्यान्न योजना म 2770 करोड़ जेमा 450 करोड़ चना बर अउ 200 करोड़ शक्कर बर प्रावधान करे गए हे। मुख्यमंत्री ह बताइन के प्रदेश म 82 परसेंट मनखे मन ल फ़ूड सिक्युरिटी कवर दे जात हे। PDS सिसटम म 577000 कार्डधारी प्रदेश म हावयं।
प्रदेश म स्वास्थ्य सेवा के क्षेत्र म जम्मो मनखे ल स्वास्थ्य सुविधा देहे खातिर स्मार्ट कार्ड म 50 हजार तक स्वास्थ्य  बीमा कवरेज देहे जाही। सियान अउ पत्रकार मन ल 30 हजार तक अकतहा बीमा कवरेज देहे जाही। प्रदेश के चार जिला अस्पताल के उन्नयन बर राशि के प्रावधान करे गए हे। सारंगढ़ म 100 अउ देवभोग म 50 बिस्तर सिविल अस्पताल के योजना हे। संगेच प्रदेश म 283 प्राथमिक स्वास्थ्य केंद्र 24 घंटा जनता मन बर खुले रहिहि। जनता ल पैथोलॉजी जइसे सुविधा फोकट म देहे जाही एकर बर 30 करोड़ के प्रावधान करे गए हे। एकर तहत सबो सरकारी पैथोलॉजी लैब म मुफ्त जांच सुविधा के व्यवस्था करे जाही। महिला अउ बाल विकास के काम म लगे मितानिन मन ल अब 75 प्रतिशत अकतहा प्रोत्साहन राशि देहे जाही। मेकाहारा म 100 अउ रायगढ़ मेडिकल कालेज म 42 अकतहा नर्स के पद एसो भरे जाही। मेडिकल कॉलेज मन के आधुनिकीकरण के तको प्रावधान हे।
15 लाख बीपीएल उपभोक्ता मन ल 40 यूनिट तक मुफ्त बिजली देहे जाही एकर बर 363 करोड़ के प्रावधान करे गए हे। अइसनहे सौभाग्य योजना बर 85 करोड़ रुपया के प्रावधान करे गए हे। ए साल ले दुर्घटना ले मृत्यु म 75 हजार के राशि ल बढ़ाके 4 लाख के बीमा कवर करे गए हे। मजदूर मन के हित बर अब कैशलेश बीमा कवर देहे जाही एकर से उमन ल इलाज बार5 तुरंत पैसे के जरूरत नइ परही।
आंगनबाड़ी कार्यकर्ता के मानदेय 5 हजार अउ सहायिका के 2.5 हजार करे गीस। गर्भवती महिला मन ल 3 किश्त म 5 हजार सहायता राशि देहे जाही। महिला कमांडो मन बर पुलिस महिला वालंटियर चेतना योजना के तहत 1000 प्रति महीना मानदेय दे जाही। मुख्यमंत्री ह बताइस के प्रदेश म महिला मन के कुपोषण के दर 47 ले घटके 37 प्रतिशत म आ गए हे। गरीब महिला मन बर पाछू 2 साल म 18 लाख नवा कनेक्शन उज्ज्वला योजना म देहे गए हे। अब सेनेटरी नैपकिन जम्मो महाविद्यालय अउ हाई स्कूल म उपलब्ध कराए जाही एकर से 10 लाख महिला मन ल सीधा लाभ मिलही।
शिक्षा के सम्बंध म बात करत मुख्यमंत्री ह बताइन के प्रदेश म अब शाला त्याग दर 0 ले 1 प्रतिशत हो गए हे। ऐसो शालेय शिक्षा बर 12472 करोड़ रुपया के प्रावधान करे गए हे जेमा मिडिल स्कूल के तको उन्नयन करे जाही।
129 मिडिल ले हाई अउ 130 हाई ले हायर सेकेंडरी स्कूल म कन्वर्जन होही। शिक्षाकर्मी बर  मुख्य सचिव के रिपोट आए म उंखर हित के सबो विकल्प मन ऊपर विचार करे के निर्णय लेहे गए हे।

Post a Comment

0 Comments