8 बछर के पाछू सुरता आईस टाटपट्टी घोटाला

दागी साहेब मन उपर कार्यवाही नइ करे के आरोप झेलत आवत छत्तीसगढ़ सरकार ह अब जुन्‍ना मामला मन उपर जांच शुरू कर दे हे। टाटपट्टी खरीदी घोटाला म राज्य सरकार ह आठ बछर पाछू जाग के शिक्षा विभाग के 9 अधिकारी मन के खिलाफ विभागीय जांच शुरू कर देहे हे। स्कूल शिक्षा विभाग ह संभागीय जांच आयोग तको गठित कर देहे हे। प्रस्तुतकर्ता लोक शिक्षण संचालनालय के सहायक संचालक संजय श्रीवास्तव ल बनाये गए हेे। आप मन ल बता दन के आरोपी अधिकारी मन में दू झन रिटायर तको हो गए हें, उहें दू प्राचार्य अउ 5 डीईओ अभी घलव अपन पद म बईठे हें।


का ये मामला
मामला 2007-08 के आए जमेा अधिकारी मल ल स्‍कूल बर हथकरघा ले तईयार टाट्पट्टी खरीदना रहिस हे, फेर आदेस ना मान के उमन पावरलूम के टाट-पट्टी खरीदीन अउ सरकार ल करीब साढ़े तीन करोड़ रुपए ले जादा के चपत लगाये रहिन हें।


ऑडिट रिपोर्ट म रहिस वसूली के सुझाव
लोक शिक्षण संचालनालय के ऑडिट रिपोर्ट समिति ह साढ़े तीन करोड़ के अनियमितता बतात येला वसूली योग्य बतायेे रहीस हे। उन्‍हें 8 बछर पाछू सरकार ह ये मामला म आरोप पत्र जारी करे के बाद सिविल सेवा नियम 1966 के नियम 14 के तहत उंखर मन उपर विभागीय जांच शुरू करे हे।


इंखर मन के खिलाफ विभागीय जांच
टाटपट्टी घोटालाा म स्कूल शिक्षा विभाग ह ओ समें के जिला शिक्षा अधिकारी राजनांदगांव (अभी सेवानिवृत्त) जीपी जोशी, ओ समें के जिला शिक्षा अधिकारी जांजगीर-चांपा (अभी सेवानिवृत्त) आनंद दास गुप्ता, ओ समें के जिला शिक्षा अधिकारी बेमेतरा (अभी डीईओ गरियाबंद) एमएल सोनवानी, ओ समें के जिला शिक्षा अधिकारी बिलासपुर (अभी डीईओ राजनांदगांव) बीएल कुर्रे, ओ समें के जिला शिक्षा अधिकारी अंबिकापुर (अभी अंबिकापुर म प्रिंसिपल) ए खलखो, ओ समें के जिला शिक्षा अधिकारी दुर्ग (अभी डीईओ दुर्ग) एके चावरे, ओ समें के जिला शिक्षा अधिकारी सूरजपुर (अभी बैकुंठपुर डाइट म प्रिंसिपल) संजय गुप्ता, ओ समें के जिला शिक्षा अधिकारी एपी एक्का (डीईओ सूरजपुर) अउ ओ समें के जिला शिक्षा अधिकारी रायगढ़ (अभी डीईओ बेमेतरा) अशोक भार्गव के खिलाफ विभागीय जांच सुरू करे हे। ये मामला म राज्य के स्कूल शिक्षा विभाग के सचिव विकासशील ह कहिन के टाटपट्टी अनियमितता मामले म अभी के स्थिति ल देखत जल्दी कार्रवाई करे जाही।

Post a Comment

0 Comments