अंधियार म नाईट विजन ले वायु सेना के जवान मन करिन सराहनीय सहयोग





हेलीकॉप्टर म तुरते पहुंचिन घटना स्थल म
रात के अंधियार म राहत अउ बचाव कार्य
मुख्यमंत्री डॉ. रमन सिंह हर व्यक्त करिस आभार

रायपुर, 07 फरवरी 2017। छत्तीसगढ़ के मुख्यमंत्री डॉ. रमन सिंह ह राज्य के सरगुजा जिला म एक भीषण सड़क हादसा म पांच बराती मन के आकस्मिक मृत्यु म गहरा दुःख व्यक्त करिन अउ घायल मन के लउहे स्वस्थ होए के कामना करिन। मुख्यमंत्री ह जिला के उदयपुर-सूरजपुर के रस्‍दा म ग्राम खम्हरिया तीर होए एक ठन हादसा के समय राहत कार्य म भारतीय वायु सेना कोति ले लउहे सहयोग बर ऊंखर प्रति आभार व्यक्त करिन। मुख्यमंत्री हर कहिन के वायु सेना के जवान एयर कमोडोर श्री अजय शुक्ला के सियानी म राहत अउ बचाव कार्य म सराहनीय सहयोग मिलिस हवय। हम बता दन के पिक-अप वैन अउ एक ट्रेक्टर के बीच टक्कर म वेन म सवार पांच बराती मन के मृत्यु हो गईस अउ कई मनखे घायल होगें। मुख्यमंत्री डॉ. रमन सिंह के निर्देश म राज्य सरकार के अधिकारी मन तुरते राजधानी रायपुर स्थित भारतीय वायुसेना के टास्क फोर्स कमांडर (नक्सल ऑपरेशन, एमपी-छत्तीसगढ़) एयर कमोडोर श्री अजय शुक्ला ले सम्पर्क करिन। श्री शुक्ला हर अपन सहयोगी जवान मन ल लेके कल झुलझुलहे 3.48 बजे भारतीय वायुसेना के हेलीकॉप्टर एमआई 17 व्ही-5 म माना विमानतल ले घटना स्थल बर उड़ान भरिन। ए खातिर पहुंचतेच उमन अउ ऊंखर सहयोगी जवान मन रात के अंधियारेच म नाइट विजन गॉगल्स पहिर के राहत अउ बचाव के ऑपरेशन शुरू करिन। टार्च अउ मोबाईल के प्रकास म घलोक बचाव काम करे गीस। गंभीर रूप ले घायल एक महिला अउ लगभग तेरह साल के एक लइका ल ओ मन तुरते हेलीकॉप्टर म लेके रायपुर पहुंचिन, घायल मन के संग दू डॉक्टर अउ सहायक घलोक रायपुर आइन। घायल मन ल प्रशासन ह तुरंते अस्पताल म भर्ती करवाइस।





Post a Comment

0 Comments