प्रधानमंत्री के ‘मेक ए इंडिया’ के सपना ल साकार करही छत्तीसगढ़ : श्री सुरेश प्रभु

रेलमंत्री अउ मुख्यमंत्री हर करिस राजनांदगांव-नागपुर तीसर रेल लाइन के शिलान्यास
‘हमसफर‘ एक्सप्रेस संग नवा 9 रेल यात्री सुविधा मन के उदघाटन
ई-मार्केटिंग, ई-केटरिंग के संग छत्तीसगढ़ के हस्तशिल्प अउ महिला समूह मन के बढ़ही रोजगार के अवसर
छत्तीसगढ़ के प्रमुख 7 रेल्वे स्टेशन मन म मिलही हवई अड्डा जइसे सुविधा
छत्तीसगढ़ म पहिली राष्ट्रीय रेल सप्‍ताह के आयोजन
रेलवाही के किनारे लगाए जाही 5 करोड़ पौधा






रायपुर, 22 अप्रैल 2017। रेल मंत्री श्री सुरेश प्रभु हर कहिस कि प्रधानमंत्री श्री नरेन्द्र मोदी के मेक ए इंडिया के सपना ल छत्तीसगढ़ लउहे साकार करही। मेक ए इंडिया के सपना ल साकार करे बर छत्तीसगढ़ ल विकसित राज्य बनाना जरूरी हावय। नवा राज्य के रूप म छत्तीसगढ़ विकास के रद्दा म लउहे आघे बढ़त हावय। श्री प्रभु आज इहां रेल्वे स्टेशन म मुख्यमंत्री डॉ. रमन सिंह के संग कई ठन यात्री सुविधा मन के शुभारंभ करे के बाद जनता ल सम्बोधित करत रहिन।
शुभारंभ समारोह म रेल मंत्री अउ मुख्यमंत्री हर राजनांदगांव ले नागपुर के बीच तीसर रेल लाइन के आधारशिला रखिन। एला मिलाके उमन प्रदेशवासी मन ल 9 आन-आन यात्री सुविधा मन के सौगात दीन। रेल मंत्री श्री सुरेश प्रभु अउ मुख्यमंत्री डॉ. रमन सिंह हर वीडियो कांफ्रेंस के जरिये बटन दबाके ए सुविधा मन के शुभारंभ करिन। डॉ. रमन सिंह हर कहिन कि छत्तीसगढ़ म 160 साल के रेल्वे के इतिहास म आज ये सोनहा दिन हावय, जब एक संग अतका अकन रेल सुविधा मन के शुभारंभ होवत हे।
रेल मंत्री श्री प्रभु हर छत्तीसगढ़ के परम्परागत हस्तशिल्प ल बढ़ावा दे बर ई-मार्केटिंग ल प्रोत्साहित करे अउ महिला समूह मन ले तइयार भोजन ई-केटरिंग के संग रेल यात्रि मन ल देवाए कराने के अपन योजना मन के बारे म घलोक बताइन। रेल मंत्री अउ मुख्यमंत्री हर जऊन यात्री सेवा मन के शुरूआत करिन ओमां रायपुर स्टेशन के गुढ़ियारी प्रवेश छोर म दू एस्केलेटर अउर प्लेटफार्म नम्बर 2-3 अउ 5-6 म लिफ्ट के सुविधा, बिलासपुर अउ दुर्ग स्टेशन मन म हाई स्पीड वाई-फाई के सुविधा, डोंगरगढ़ स्टेशन म नवनिर्मित सरग निसेनी, दुर्ग स्टेशन के प्लेटफार्म नम्बर 1, 2-3 अउर 4-5 म लिफ्ट के लोकार्पण सामिल हावय। ए अवसर म दुर्ग स्टेशन से चलइया दुर्ग-निजामुद्दीन ‘हमसफर’ द्वि-साप्ताहिक एक्सप्रेस के नवा सेवा ल घलोक हरी झंडी दिखाकर शुभारंभ करे गीस।
श्री सुरेश प्रभु हर अपन उद्बोधन म कहिन कि छत्तीसगढ़ म विकास के अड़बड़ संभावना हवय। मुख्यमंत्री डॉ. रमन सिंह के नेतृत्व म छत्तीसगढ़ अड़बड़ जल्‍दी विकास कोति आघू बढ़त हवय। इहां मिलइया खनिज संग आन संसाधन मन के दोहन के भरपूर लाभ छत्तीसगढ़वासी मन ल मिल सकय, ए दिशा म रेलवे ले ज्वाइंट वेंचर प्रोजेक्ट के जरिये विशेष कार्य योजना तैयार करे जात हे। उमन कहिन कि सन् 2009 ले 2014 तक जिहां छत्तीसगढ़ ल रेल्वे ले 311 करोड़ रूपया के सालाना बजट मिलत रहिस, उन्‍हें प्रधानमंत्री श्री नरेन्द्र मोदी के नेतृत्व म केन्द्र सरकार ले सन् 2014 ले 2016 तक छत्तीसगढ़ म हर बछर 1668 करोड़ रूपया रेल्वे म खरचा करे जात हे, उहें चालू सत्र बर 3676 करोड़ रूपए के निवेश के लक्ष्य रखे गए हावय। उमन कहिन कि प्रधानमंत्री श्री नरेन्द्र मोदी के मेक ए इण्डिया के सपना ल साकार करे बर छत्तीसगढ़ ल विकसित राज्य बनाना जरूरी हावय। श्री प्रभु हर बताइस कि ऊंखर कार्यकाल के तीसरइया अउ छत्तीसगढ़ के पहिली रेल सप्‍ताह के आयोजन रायपुर म करे जात हावय। एखर ले पहिली रेल सप्‍ताह के आयोजन आसाम अउ ओडिशा म करे गए हावय।
रेलमंत्री हर कहिन कि छत्तीसगढ़ के परम्परागत ग्रामीण शिल्‍पी मन ल उंखर कलाकृति मन के बेहतर दाम मिल सकय, एखर खातिर रेल्वे के वेबसाइट म ई-मार्केटिंग के जरिये ए चीज मन के मार्केटिंग करे जाही जेखर ले ये कलाकृति मन बाहिर देस तक पहुंच सकहीं। अइसनहे इहां के महिला समूह मन ल ई-केटरिंग के जरिये जोड़े जाही, जेखर ले महिला समूह मन ल बेहतर आमदनी होही अउ यात्री मल ल घर के बने खाना मिल सकही। श्री प्रभु हर कहिन कि रेलवे ले छत्तीसगढ़ के 7 प्रमुख स्टेशन मन म हवई अड्डा जइसे सुविधा मन के विकास करे जाही। ग्लोबल वार्मिंग ले निपटे बर रेलवे हर रेलवाही मन के किनारे 5 करोड़ पउधा घलोक लगाय के निर्णय ले हावय, जेमा छत्तीसगढ़ म दू करोड़ पौधा लगाए जाही।
पानी के रीस्टोर बर राज्य सरकार के संग मिलके मनरेगा के तहत जल संरचना मन के निर्माण करे जाही। अइसनहे रेलवे स्टेशन मन ले निकले कचरा के उचित प्रबंधन बर उहां के नगरीय निकाय के संग मिलके काम करे जाही। ए काम ले इहां के युवा मन ल रोजगार के बेहतर अवसर मिलही।
मुख्यमंत्री डॉ. रमन सिंह हर कहिन कि आज के दिन ऐतिहासिक हावय, जब प्रदेशवासी मन ल अतका अकन रेल सुविधा मन के सौगात मिले हावय। उमन कहिन कि राजनांदगांव-नागपुर तीसर लाइन के निर्माण ले जिहां रेलवे ट्रैफिक के दबाव कम होही उन्‍हें हिन्दुस्तान के आन राज्य मन के संग छत्तीसगढ़ के संपर्क बढ़ही। मुख्यमंत्री हर कहिन कि 160 साल म प्रदेश म 1290 किलोमीटर रेलवे लाइन के विस्तार करे गए हावय, उहें प्रधानमंत्री श्री नरेन्द्र मोदी अउ रेलमंत्री श्री सुरेश प्रभु के नेतृत्व म अवइया 10 साल म छत्तीसगढ़ म 1300 किलोमीटर नवा रेल लाइन के विस्तार करे जाही। उमन बताइन कि छतीसगढ़ के चार बड़े प्रोजेक्टों ल राज्य सरकार, रेलवे अउ बैंक के ज्वाइंट वेंचर ले विकास करे जाही। किरन्दुल ले कोरापुट तक चलइया वाले ट्रेन म अत्याधुनिक सुविधा मन के संग अइसन आरपार दिखइया डब्‍बा लगाए गए हावय, जेखर ले मनखे ट्रेन म बइठे-बइठे बाहिर के प्राकृतिक मनोरम दृश्य मन के आनंद ले सकहीं। मुख्यमंत्री हर कहिन कि छत्तीसगढ़ के बिलासपुर रेल्वे जोन रेल मंत्रालय ल सबले जादा राजस्व देहे रहिस। उमन रेलमंत्री ले आग्रह करिन कि एला ध्यान मं रखकर राज्य ल अउ जादा रेल सुविधा मिलना चाही।
ए अवसर म महिला अउ बाल विकास मंत्री श्रीमती रमशीला साहू, रायपुर के लोकसभा सांसद श्री रमेश बैस, राज्यसभा सांसद सर्वश्री भूषण लाल जांगड़े अउ रामविचार नेताम अउ श्रीमती छाया वर्मा, राजनांदगांव के लोकसभा सांसद श्री अभिषेक सिंह, विधायक श्री श्रीचंद सुंदरानी, रेल्वे बोर्ड के अध्यक्ष श्री ए.के. मित्तल, वाणिज्य, उद्योग अउ खनिज संसाधन विभाग के सचिव श्री सुबोध सिंह, रेल्वे के महाप्रबंधक श्री एस.एस. सोईन संग अड़बड़ झन नागरिक, रेल्वे के अधिकारी अउ कर्मचारी उपस्थित रहिन।







Post a Comment

0 Comments