हर तीन महीना मं होही अधिकारी मन के काम-काज के समीक्षा





07 अपरेल 2017। मुख्यमंत्री डॉ.रमन सिंह हर कहिन हे कि सरकारी योजना मन के बेहतर परिणाम प्राप्त करे बर अधिकारी मन के काम-काज के हर तीन महीना मं समीक्षा करे जाही अऊ ऊंखर कार्य मन के मूल्यांकन करे जाही। उमन अधिकारी मन ल गांव अऊ शहर मन के सघन दौरा करे अऊ योजनाओं के मौका मुआयना करे के घलोक निर्देश दीन हावे। मुख्यमंत्री कोरिया जिला के मुख्यालय बैकुण्ठपुर मं लोक सुराज अभियान के तहत आयोजित जिला स्तरीय समीक्षा बैठक ल संबोधित करत रहिन। उमन बैठक के अध्यक्षता करत करत कहिन कि विकास कार्य ल समय म पूरा करे बर निरधारित करे गए लक्ष्य मन के समीक्षा, हर तीन महिना मं करे जाही। एकर खातिर लक्ष्य मन ल पूर्ति करे म विषेश ध्यान दे जाय। मुख्यमंत्री डॉ.सिंह हर लोक सुराज अभियान 2017 'लक्ष्य समाधान का' के तहत प्राप्त आवेदन अऊ शिकायत मन म करे गए कार्यवाही के विस्तार ले समीक्षा करिन। उमन प्रधानमंत्री आवास योजना के तहत प्राप्त आवेदन मन के समीक्षा करत-करत कहिन कि निराकृत करे गए आवेदन मन ल 3 श्रेणी मं विभाजित करे जाए। जेमा पहली श्रेणी मं जऊन आवेदन स्वीकृत कर दे गये हावे, दुसरा श्रेणी मं लक्ष्य पूर्ण होए के कारण ए योजना के लाभ अवइया बछर मं देहे बर प्रतीक्षा सूची तैयार करे बर अऊ तीसर श्रेणी मं अइसन आवेदन जऊन पात्र नइ पाए जाय के कारण अस्वीकृत करे गये हावे। मुख्यमंत्री हर कहिन कि प्रधानमंत्री आवास योजना के तहत स्वीकृत प्रकरण मन मं हितग्राही मन के खाता मं पहली किश्त जल्दी जमा करे जाय। उमन महात्मा राष्‍ट्रीय ग्रामीण रोजगार गांरटी योजना (मनरेगा) के तहत चलत निर्माण कार्य के घलोक समीक्षा करिन। डॉ. सिंह हर मनरेगा के तहत भू-जल संरक्षण के दृष्टि ले जादा ले जादा संख्या मं कुंआ अऊ डबरी निर्माण के काम लेहे के निर्देश दीन। प्रधानमंत्री उज्जवला योजना के समीक्षा करत करत मुख्यमंत्री हर खाद्य अधिकारी ले कहिन कि तुमन ये सुनिश्चित करव कि हितग्राही मन ल गैस सिलेण्डर समय म मिलत रहे।
अइसन व्यवस्था करे जाय कि योजना के हितग्राही परिवार मन ल सिलेण्डर 20 किलोमीटर के दायरे मं मिल जाय। जरूरी होए म अतिरिक्त वितरण केन्द्र खोले के घलोक प्रस्ताव भेजे जाय। डॉ सिंह हर सौर सुजला योजना के समीक्षा करत करत कहिन कि सोनहत अऊ जनकपुर जइसन दूरस्थ क्षेत्र मन के पहिचान कर ले जाये जहॉ नदी-नाला मन मं बारहों महिना पानी रहिथे उहॉ सौर सुजला योजना के तहत सोलर सिंचाई पम्प स्थापित करे के कार्यवाही बडे पैमाना म करव। मुख्यमंत्री हर हैण्डपंप अऊ नल योजना मन ल समीक्षा करत करत लोक स्वास्थ्य यांत्रिकी विभाग के अधिकारी मन से कहिन कि ओ मन सब्बो हैण्डपंप अऊ नल योजना मन के बेहतर संचालन सुनिश्चित करव अउ समय-समय म ओखर जॉच घलोक कराते रहव अउ खराब होए के सूचना मिले म ओ मन ल तुरंत दुरूस्‍त कराना सुनिश्चित करव। उमन कहिन कि नलजल योजना मन मं आए खराबी ल दूर करके एखर सूचना संबंधित क्षेत्र के विधायक ल घलोक देवव। मुख्यमंत्री हर कहिन कि ग्रामीण क्षेत्र मन मं पेयजल उपलब्‍ध कराए बर सोलर पंप एक अच्छा विकलप हावे। एखर जादा ले जादा उपयोग करना चाही। डॉ.सिंह हर विद्युत मण्डल के अधिकारी मन से कहिन कि दीन दयाल उपाध्याय ग्रामीण विद्युतीकरण योजना के लक्ष्य ल दिसम्बर 2017 तक पूरा करे बर हर संभव प्रयास करे जाए।
बैठक मं श्रम, खेल अउर युवा कल्याण मंत्री श्री भईयालाल राजवाडे, छत्तीसगढ़ शासन मं संसदीय सचिव अउर विधानसभा भरतपुर सोनहत के विधायक श्रीमती चम्पादेवी पावले, मनेन्द्रगढ विधानसभा के विधायक श्‍याम बिहारी जायसवाल, छत्तीसगढ़ के मुख्य सचिव विवेक ढांड, मुख्यमंत्री के संयुक्त सचिव रजत कुमार, अतिरिक्त पुलिस महानिदेशक टी.जे.लांगकुमेर, कोरिया जिला के प्रभारी सचिव सोनमणि बोरा, जनसम्पर्क विभाग के संचालक राजेश सुकुमार टोप्पो, संरगुजा संभाग के कमिश्‍नर टी.से.महावर, कोरिया जिला के कलेक्टर एस प्रकाश अऊ कई विभाग के संभागीय स्तरीय अधिकारी अऊ कोरिया जिला के जिला अधिकारी उपस्थित रहिन।


style="display:block"
data-ad-client="ca-pub-3208634751415787"
data-ad-slot="4115359353"
data-ad-format="link">



style="display:block"
data-ad-format="autorelaxed"
data-ad-client="ca-pub-3208634751415787"
data-ad-slot="1301493753">

Post a Comment

0 Comments