हमर छत्तीसगढ़ योजना : संसदीय सचिव श्री तोखन साहू मिलिन मुंगेली के पंच-सरपंच मन ले

आवासीय परिसर म मुलाकात के बाद पंचायत प्रतिनिधि मन ल घुमाइन मंत्रालय






रायपुर. 21 अप्रैल 2017। कृषि अउ जल संसाधन विभाग के संसदीय सचिव अउ लोरमी के विधायक श्री तोखन साहू हर अध्ययन भ्रमण म राजधानी रायपुर आए पंचायत प्रतिनिधि मन से सौजन्य मुलाकात करिन। हमर छत्तीसगढ़ योजना के अंतर्गत मुंगेली जिला के लोरमी विकासखंड ले नौ ग्राम पंचायत ले अंदाजन 70 पंच-सरपंच दू दिन के अध्ययन प्रवास म रायपुर आए रहिन हें। संसदीय सचिव श्री साहू हर योजना के आवासीय परिसर नवा रायपुर के उपरवारा स्थित होटल प्रबंधन संस्थान म जनप्रतिनिधि मन ले मुलाकात के बाद ओ मन ल मंत्रालय के भ्रमण कराइन। उमन मंत्रालय म अपन कार्यालय देखात पंच-सरपंच मन ल उहां होवइया कार्य अउ व्यवस्था मन के बारे म बताइन।
श्री साहू हर आवासीय परिसर म पंचायत प्रतिनिधि मन ल संबोधित करत करत कहिन कि छत्तीसगढ़ ह पाछू 15 बछर म अड़बड़ विकास करे हवय। इहां के बहुत अकन योजना मन ल देखे खातिर दूसर राज्य मन के मंत्री अउ अधिकारी आत रथें। अध्ययन यात्रा म रायपुर अउ नवा रायपुर के भ्रमण कर आप मन खुदे प्रदेश के विकास अउ सरकार के योजना मन ल बने सहिन समझ सकहू। श्री साहू हर पंच-सरपंच मन ले चर्चा करके गांव मन म चलत विकास कार्य मन के जानकारी लीन। उमन पंचायत प्रतिनिधि मन के संग आवासीय परिसरे म जेवन करिन। ए दौरान पंच-सरपंच मन हर अपन अध्ययन भ्रमण के अनुभव घलोक उमन ले साझा करिन।






Post a Comment

0 Comments