मुख्‍यमंत्री बोलिस जब अमित राजनीति सीखत रहिस तब ले लोकसुराज करत हंव




रायपुर, 14 अप्रैल 2017। मुख्‍यमंत्री डॉ. रमन सिंह हर अजित जोगी के बयान उपर पलटवार करत कहिस कि जब अमित जोगी राजनीति सीखत रहिस ओकर पहिलि ले मैं लोकसुराज करत हौं। ए अभियान के शुरूवात 2005 से करे रहेंव, तब अमित समझत रहिस कि राजनीति का होथे। मुख्‍यमंत्री हर ये बयान पूर्व मुख्यमंत्री अजित जोगी के ओ बयान के जवाब म देइस, जेमां जोगी हर कहे रहिस कि लोकसुराज अमित जोगी के नकल आए। मुख्‍यमंत्री हर आगू कहिन कि कोन का कहिथे, का नइ कहय एखर ले कुछु फरक नइ परय। मोर आदर्श सिरिफ प्रधानमंत्री नरेन्द्र मोदी हावय ऊंखर सपना के आधारेच म प्रदेश के विकास करना हावय। मुख्‍यमंत्री हर ये बयान भीमराव अंबेडकर के 126 वीं जयंती अवसर म राजनांदगांव जात खानी दीन।
आप मन ल बता दन के जनता कांग्रेस छत्तीसगढ़ (जे) के सुप्रीमों अउ पूर्व मुख्यमंत्री अजीत जोगी हर कहे रहिस कि लोक सुराज हर साल होथे अउ अब ये नौटंकी कस लागथे। ये मां सिरिफ पइसा के बर्बादी होवत हावय। अफसर मन ल भीड़ जुटाए के टारगेट दे जाथे। मुख्‍यमंत्री जऊन करत हे, ओला अमित जोगी अपन राजनीति के शुरुआत म करत रहिस। आज मुख्यमंत्री अमित के नकल करत हे। हमर पार्टी के बढ़त जनाधार ले मुख्‍यमंत्री विचलित हो गए हावय।






Post a Comment

0 Comments