पंचायत मंत्री श्री अजय चन्द्राकर ले ग्राम बगौद के ग्रामीण मन करिन मुलाकात




रायपुर, 19 अप्रैल 2017। पंचायत अउ ग्रामीण विकास मंत्री श्री अजय चन्द्राकर ले आज इहां ऊंखर निवास कार्यालय म कुरूद विकासखण्ड के ग्राम बगौद के ग्रामीण मन सौजन्य मुलाकात करिन। श्री कमल नारायण ध्रुव के नेतृत्व म पंचायत मंत्री ले मिले आए ग्रामीण मन बताइन कि उमन सात साल म तीस महिला समूह बनाके कुछ पइसा अउ चाउंर सकेल के अंदाजन दू लाख रूपया जमा करे हावय। ग्रामीण मन बताइन कि गोड़वांना बैंक महिला समूह नाम ले एक समिति के गठन करे गए हे। हमन इही बचत पइसा म ले कम व्याज म उधार लेके पारंपरिक व्यवसाय करते हावन। श्री चन्द्राकर ह महिला मन ले आर्थिक सशक्तिकरण के दिशा म करे जात ये उदीम बर बधाई अउर शुभकामना दीन। ए मौका म ग्रामीण मन ग्राम बगौद म आदिवासी सामुदायिक भवन बनाए के मांग करिन। जऊन ल श्री चन्द्राकर हर सहर्ष स्वीकार करत भरोसा देवइन। श्री चन्द्राकर हर ग्रामीण मन ले कहिन कि ओ मन शौचालय के उपयोग करंय अउ दूसरो ल घलोक शौचालय के उपयोग करे बर जागरूक करंय। ए ग्रामीण मन म श्रीमती प्रेमीन नेताम, देवकी नेताम, सरस्वती कोर्राम, नीरा नेताम, गोमती नेताम, सरिता नेताम, जंयती नेताम, फगनी नेताम, पूर्णिमा कोर्राम, सुंमित्रा कोर्राम, अंजली मण्डावी, सुरूज छेदइया, हरोइया छेदइया, सुनीता उइके, दशोदा मण्डावी अउ मानकी मरकाम संग आन सदस्य सामिल रहिन।






Post a Comment

0 Comments