लोक सुराज अभियान के लक्ष्य जनता के समस्या मन के समाधान : डॉ. रमन सिंह





मुख्यमंत्री सामिल होइन गब्दी के समाधान शिविर मं


कहिस लोगन मन ल समस्या मन के हल खोजे बर भटकना मत परे
प्रधानमंत्री आवास योजना के आवेदन ग्रामसभा मन मं अनुमोदित कराए के आग्रह


रायपुर, 12 अप्रैल 2017। मुख्यमंत्री डॉ. रमन सिंह हर आज बालोद जिला के गुण्डरदेही विकासखंड के ग्राम गब्दी मं लोक सुराज अभियान के अंतर्गत आयोजित समाधान शिविर मं कहिन कि लोक सुराज अभियान के उद्देश्य जनता अऊ प्रशासन ल नजदीक लाके आम जनता के समस्या मन के जल्दी समाधान सुनिश्चित करना हावे। उमन अधिकारी मन से कहिन कि लोगन ल अपन छोट-छोट समस्या मन के हल खोजे बर भटकना मत परय।
मुख्यमंत्री हर ग्रामीण मन ले आग्रह करिन कि ओ मन प्रधानमंत्री आवास योजना के अपन आवेदन के अनुमोदन संविधान बनइया डॉ. भीमराव अम्बेडकर के जयंती ले आयोजित करे जात ग्राम सभा मन मं करा लेवव। ग्रामसभा मन के आयोजन 14 अप्रैल ले 25 अप्रैल तक करे जाही। उमन कहिन कि प्रधानमंत्री आवास योजना मं बड़ संख्या मं आवेदन सरलग मिलत हावे। मुख्यमंत्री हर बताइस कि हालेच के नई दिल्ली प्रवास के बेरा उमन प्रधानमंत्री श्री नरेन्द्र मोदी ले छत्तीसगढ़ बर प्रधानमंत्री आवास योजना के कोटा बढ़ाके 10 लाख करे के आग्रह करिन हावे। मुख्यमंत्री हर प्रधानमंत्री उज्ज्वला योजना के उल्लेख करत बताइन कि प्रदेश मं अब तक गरीब परिवार मन के दस लाख महिला मन ल रसोई गैस कनेक्शन देहे गए हे। अवइया समें मं ए योजना मं 25 लाख रसोई गैस कनेक्शन अऊ दे जाही। उमन ए योजना के पात्र हितग्राही मन के नाम के सूची ग्राम पंचायत मन मं प्रदर्शित करे के निर्देश अधिकारी मन ल दीन। गब्दी के शिविर मं राजस्व विभाग ल प्राप्त आवेदन मन के जल्दी निराकरण बर मुख्यमंत्री हर तहसीलदार अऊ राजस्व कर्मचारी मन के सराहना करिन।
मुख्यमंत्री हर शिविर मं ग्रामीण मन ल ये जानकारी घलोक दीन कि मुख्यमंत्री स्वास्थ्य सुरक्षा बीमा योजना के अंतर्गत निःशुल्क इलाज के सीमा 30 हजार रूपया ले बढ़ाके 50 हजार रूपया कर देहे गए हे। उमन अधिकारी मन ल लोगन के छोट-छोट समस्या मन के निराकरण प्राथमिकता के आधार म करे के निर्देश दीन। मुख्यमंत्री हर कहिन कि राजस्व, बिजली, पेयजल संबंधी काम बर लोगन ल भटकना मत परे। उमन जनप्रतिनिधि मन से स्कूल मन मं शिक्षा अऊ बच्चा मन के भोजन के गुणवत्ता के परीक्षण बेरा-बेरा म करे के आग्रह घलोक करिन।






Post a Comment

0 Comments