नक्सल घटना: मुख्यमंत्री हर वरिष्ठ अधिकारी मन के आपात बैठक लीन

रायपुर, 25 अपैरल 2017। मुख्यमंत्री डॉ. रमन सिंह हर काली रतिहा इहां अपन निवास कार्यालय मं सुकमा जिला के दोरनापाल क्षेत्र के नक्सल वारदात म वरिष्ठ अधिकारी मन के आपात बैठक लेके स्थिति के समीक्षा करिन। उमन अधिकारी मन ल जरूरी दिशा-निर्देश दीन। आप मन जानतेच होहू कि मुख्यमंत्री काली नई दिल्ली मं रहिन अऊ उहां ले आज 25 अपरेल को बिहनिया रायपुर अवईया रहिन, फेर मंझनिया ओ मन ल जइसे ही ए घटना के जानकारी मिलीस, उमन नई दिल्ली के अपन दौरा तुरंते निरस्त कर दीन अऊ संझा के फ्लाईट ले रायपुर लहुट आइन।
डॉ. सिंह हवई अड्डा ले सीधा राजधानी के एक प्राईवेट अस्पताल पहुंचिन, जिहां उमन ए घटना मं घायल सी.आर.पी.एफ. के जवान मन से मिलके ऊंखर स्वास्थ्य के जानकारी लीन अऊ डॉक्टर मन ल उंखर बेहतर से बेहतर इलाज करे के निर्देश दीन। मुख्यमंत्री हर जवान मन के हौसला बढ़ाइन। उमन ए नक्सल वारदात मं 25 जवान मन के शहादत उपर गहरा दुःख व्यक्त करिन अऊ घटना के बड़ निन्दा करिन। डॉ. सिंह के अध्यक्षता मं रात को ऊंखर निवास कार्यालय मं आयोजित आपात बैठक मं मुख्य सचिव श्री विवेक ढांड, अपर मुख्य सचिव श्री एन.बैजेन्द्र कुमार, गृह विभाग के प्रमुख सचिव श्री बी.व्ही.आर. सुब्रमण्यम, मुख्यमंत्री के प्रमुख सचिव श्री अमन कुमार सिंह, सचिव श्री सुबोध कुमार सिंह, पुलिस महानिदेशक श्री ए.एन. उपाध्याय, पुलिस महानिदेशक (नक्सल ऑपरेशन) श्री डी.एम. अवस्थी, गृह विभाग के सचिव श्री अरूण देव गौतम, जनसम्पर्क विभाग के सचिव श्री संतोष मिश्रा, संचालक जनसम्पर्क श्री राजेश सुकुमार टोप्पो, मुख्यमंत्री के संयुक्त सचिव श्री रजत कुमार अऊ अतिरिक्त पुलिस महानिदेशक श्री संजय पिल्ले संग आन संबंधित वरिष्ठ अधिकारी उपस्थित रहिन।

Post a Comment

0 Comments