गांव के लईका जानथे 28, 29 अउ 30 के पहाड़ा, सहर के लईका हवय टुटहा गाड़ा

मुख्यमंत्री उतरिन पुटपुटा गांव,
चौपाल लगाईन बर के छांव.
बर के छांव म लगिस चौपाल,
स्‍वागत करिन सब बाल-गोपाल.
स्कूल के लइका मन ले कविता, गिनती अउ पहाड़ा सुनके खुस होईन मुख्‍यमंत्री






आज 06 मई 2017 के दिन, लकलकात घाम अउ झांझ भरे मंझनिया म मुख्यमंत्री डॉ. रमन सिंह के हवई जिहाद अचानक कबीरधाम जिला के ग्राम पुटपुटा, विकासखंड-पंडरिया उतरिस। जिहां उमन ल पाके गांव वाले मन बर के छइंहा म तुरते चौपाल जमाईन। ये चौपाल म मुख्‍यमंत्री ह गांव वाला मन से बातचीत करके उंखर बहुत अकन समस्या मन के निराकरण करिन। उमन उहां गांव वाले मन के संगें-संग उहां के स्कूल के लइका मन तिर घलोक गोठ-बात करिन। मुख्यमंत्री के अचानक आए के खबर इलाका म फइलिस त देखते-देखत तीर-तार के गांव के मनखे अउ किसान मन अपन मुख्‍यमंत्री मेर मिले चौपाल म पहुंच गइन। डॉ. सिंह हर वो गांव के नान्हें स्कूल के लइका मन ले कविता, गिनती अउ पहाड़ा सुनके उंखर हौसला बढ़ाइन। कई लइका मन ह मुख्यमंत्री ल 28, 29 अउ 30 के पहाड़ा तको सुनाइन।
गांव वाले मन ले चौपाल म गोठ-बात करत मुख्यमंत्री ल पता चलिस कि उहां बड़े नहर के मरम्मत हो जाय म बहुत झन किसान मन ल किसानी खातिर पानी पलोए के लाभ मिलही। ये बात के गम चले म मुख्‍यमंत्री ह तुरते अधिकारी मन ले पूछिंन अउ वो काम बर एक करोड़ रूपिया के मंजूरी बर घोषणा करिन। गांव वाला मन के मांग म पुटपुटा गांव के खालेपारा म अउ नदी तीर के एक ठन मोहल्ला म कुल तीन हैंडपम्प के मंजूरी घलोक तुरन्ते प्रदान करिन। गांव वाला मन बताईन कि बिरझूपारा म बिजली के खंबा गड़ई म देरी होवत हे तेखर कारन उहां बिजली नइ पहुचे हे त मुख्‍यमंत्री ह बरसा के मौसम आए के पहिली बिजली खंबा लगा के कनेक्शन देहे के घलोक घोषणा करिन। मुख्यमंत्री ह गांव वाले मन ल प्रधानमंत्री उज्ज्वला योजना के बारे म बताईन अउ कहिन कि ए योजना म अपके गांव म दू दिन के भीतर तीस महिला मन ल रसोई गैस कनेक्शन दे जाही।






Post a Comment

0 Comments