कृषि मंत्री हर मोहदा समाधान शिविर म दीन तीन काम बर 34 लाख रूपया के मंजूरी


  • वरिष्ठ कृषि विस्तार अधिकारी ल निलंबित करे के निर्देश


रायपुर, 19 मई 2017। कृषि मंत्री श्री बृजमोहन अग्रवाल हर लोक सुराज अभियान के तहत् बिलासपुर जिला के बिल्हा विकासखण्ड के ग्राम मोहदा म आयोजित समाधान शिविर म 03 काम बर 34 लाख रूपया स्वीकृत करे के घोषणा करिन। उमन मोहदा म खेल मैदान बनाए बर 15 लाख रूपया, ग्राम पंचायत मोहदा के नवा भवन बर 14 लाख रूपया अउ मोहदा म नाली अउ सी.सी.रोड बर 05 लाख के स्वीकृति के घोषणा करिन। श्री अग्रवाल हर गुजरात कृषि महोत्सव म सामिल होवइया क्षेत्र के किसान मन के वाहन ल हरी झंडी देखाके रवाना घलोक करिन।
कृषि मंत्री श्री अग्रवाल हर समाधान शिविर ल सम्बोधित करत कहिन कि लोक सुराज अभियान हर साल आयोजित करे जात हावय। ये प्रदेश सरकार के प्राथमिकता के कार्यक्रम आए। एखर ले शासन के संचालित कइ ठन जनकल्याणकारी योजना मन के जमीनी हकीकत से रूबरू होए के अवसर मिलथे। अभियान के माध्यम ले आम जनता के कई ठन मांग अउ समस्या ल जाने समझे के अवसर घलोक मिलथे। अभियान के समय जनता के हजारों आवेदन मन के निराकरण करे जात हावय। एखर ले जनता ल काफी सहूलियत होवत हे। श्री अग्रवाल हर ए अवसर म किसान मन ल धान के अलावा आन नकदी फसल, उद्यानिकी के खेती के संगें-संग आय के उपरहा जरिया बनाए मछलीपालन, मुर्गी पालन के काम शुरू करे के सलाह दीन। उमन कहिन कि सब्बो किसान मन ल अपन परिस्थिति के जइसे आमदनी के अतिरिक्त जरिया बनाए बर कोनो नइ कोनो काम धंधा करना चाही। किसान एखर बर प्रदेश सरकार के कइ ठन योजना मन से आर्थिक सहयोग ले सकत हे। उमन खेती म बेहतर उत्पादन लेहे बर किसान मन ल मिट्टी परीक्षण कराए के आव्हान करिन। शिविर म किसान श्री हर प्रसाद ल ऊंखर खेत म डबरी निर्माण के स्वीकृति देहे गीस। कृषि मंत्री श्री अग्रवाल हर क्षेत्र म पेयजल, विद्युत आपूर्ति, स्वास्थ्य, संस्थागत प्रसव अउर आन योजना मन के क्रियान्वयन के संबंध म जानकारी प्राप्त करिन अउ संबंधित अधिकारी मन ल जरूरी कार्रवाई करे के निर्देश दीन। श्री अग्रवाल हर शिविर म 02 किसान मन ल स्प्रेयर पंप, सेवा सहकारी समिति हिर्री के 05 हितग्राहियों ल ऋण चेक, 02 किसान मन ल हेल्थ कार्ड अउर 05 किसान मन ल डेबिड कार्ड के वितरण करिन। कृषि मंत्री हर मोहदा के मानस मंडली ल स्वेच्छानुदान से 05 हजार दे के घोषणा घलोक करिन।

वरिष्ठ कृषि विस्तार अधिकारी ल निलंबित करे जाए: कृषि मंत्री के निर्देश
कृषि मंत्री श्री अग्रवाल हर किसान मन बर मिट्टी स्वास्थ्य कार्ड के वितरण म लापरवाही के शिकायत ल गंभीरता से लीन। कृषि मंत्री से किसान मन हर ए आशय के शिकायत करिन। ए बात म श्री अग्रवाल हर विभाग के वरिष्ठ अधिकारी मन से कहिन कि क्षेत्र के वरिष्ठ कृषि विस्तार अधिकारी श्री अनिल शुक्ला ल निलंबित कर शिकायत के जांच करे जाय। श्री अग्रवाल हर शिविर म कई ठन विभाग के अधिकारी-कर्मचारी ल शासकीय योजना मन के क्रियान्वयन अउ प्रगति के हिसाब देहे बर जनता के सामने बलाइन। अधिकारी-कर्मचारी मन के देहे जानकारी के वास्तविकता के पता लगाय बर उमन आम नागरिक मन से पूछताछ करिन। ए अवसर म लोकसभा सांसद श्री लखनलाल साहू, इंदिरा गांधी कृषि विश्वविद्यालय के कार्यकारिणी के सदस्य श्री द्वारिकेश पाण्डेय, जनपद पंचायत बिल्हा के उपाध्यक्ष श्री विक्रम सिंह, कलेक्टर श्री अन्बलगन पी. अउ आम नागरिक बड़ संख्या म उपस्थित रहिन।

Post a Comment

0 Comments