एक भूपेश ल चुप कराए के उदीम करहू त 50 तइयार हो जाही

रायपुर। जमीन घोटाला मं फंसे छत्तीसगढ़ प्रदेश कांग्रेस कमेटी के अध्यक्ष भूपेश बघेल ल विधानसभा म नेता प्रतिपक्ष टीएस सिंहदेव ह संग देहे खातिर ट्विटर म वीडियो सन्देश जारी करके रमन सरकार ल चेतावनी देहे हे कि एक भूपेश बघेल ल चुप कराए के उदीम करहू त 50 भूपेश बघेल तैयार हो जाही।
बघेल के खिलाफ ईओडब्ल्यू मं केस दर्ज होए म बगियाए टीएस सिंहदेव ह सरकार ल आड़े हाथ लेहे हे। विधानसभा मं विपक्ष के नेता टीएस सिंहदेव के कहना हे कि ए मामला मं भूपेश बघेल ल कोनो फायदा नइ पहुंचाए गए हे, भलुक ओला नुकसान होय हे। उमन ये घलोक कहे हें कि ओ बेरा भूपेश ओ समिति के पदेन सदस्य रहिन अऊ ओ मन मीटिंग मं घलोक नइ रहिन। अइसन म उनखर उपर प्रभावित करके प्लॉट लेहे के आरोप पूरा गलत हे।
3 मिनट के वीडियो मं वो जऊन तेवर मं बोलत नजर आवत हें तेखर ले ये लगत हे कि भ्रष्टाचार के आरोप ले घेराए बघेल ल कांग्रेस ह जमके समर्थन देहे बर भिड़ गए हे। सिंहदेव के ये वीडियो ये जाहिर कर देहे हे कि बघेल उपर लगे आरोप के बाद घलोक पार्टी ओखर उपर कोनो एक्शन झन होवय अउ उंखर प्रदेश अध्यक्ष के पद बने रहय ये चाहत हे।

Post a Comment

0 Comments