भूपेश परिवार सहित पहुचिन ईओडब्ल्यू आफिस, कांग्रेसी मन करिन हंगामा

रायपुर, भिलाई-3 के मानसरोवर योजना म जमीन हथियाये के आरोप म फंसे छत्तीसगढ़ प्रदेश कांग्रेस कमेटी के अध्यक्ष भूपेश बघेल आज राज्य आर्थिक अपराध अन्वेषण ब्यूरो (ईओडब्ल्यू कार्यालय) पहुंचिन। ओ मन अपन 75 साल के मां अउ कुटुंब समेत ईओडब्ल्यू कार्यालय पहुंचके अपन बयान दर्ज कराना चाहत रहिन। ईओडब्ल्यू के कहना रहिस कि अभी जांच चलत हे अउ जब हमला जरूरत परही हम आप ल स्‍वयं बला लेबोन, फेर भूपेश ह बयान दरज करवाए बर अड़ गए अउ धरना म बईठ गंय। खबर पाके बड़ झन कांग्रेसी घलोक पहुंचके उंहा धरना-प्रदर्शन करे लागिन। ए दौरान भूपेश के मॉं के तबियत बिगड़ गीस। ओखर इलाज करे खातिर डॉक्टर मौका म बलाए गीस। खबर हवय के कांग्रेसी मन के भीड़ बाढ़त देखिन त पुलिस ह आफिस के दरवाजा म तारा लगा दीस, त कांग्रेसी मन गेट के ऊपर चढ़के प्रदर्शन करे लगिन।
ईओडब्ल्यू कार्यालय म बघेल अपन अउ अपन कुटुंब के सदस्य मन के बयान दर्ज कराए के मांग म अड़े रहिन। ऊंखर संग विधानसभा नेता प्रतिपक्ष टीएस सिंहदेव अउ प्रदेश के दिग्गज कांग्रेसी नेता पूर्व केंद्रीय मंत्री चरणदास महंत, पूर्व मंत्री मोहम्मद अकबर, पूर्व नेता प्रतिपक्ष रवीन्द्र चौबे, विकास उपाध्याय घलोक मौके म पहुंचके प्रदर्शन म सामिल होइन।
आप मन जानतेच होहू कि 2014 म बघेल के भतीजा अउ भाजपा नेता विजय बघेल हर जमीन घोटाले के शिकायत ईओडब्ल्यू म करे रहिन। तब ले करीब 3 साल ले ईओडब्ल्यू म केस लंबित रहिस। ईओडब्ल्य हर जमीन घोटाला मामला म भूपेश के खिलाफ भ्रष्टाचार अधिनियम के तहत मामला दर्ज करे हावय। ये मां उंखर पत्नी मुक्तेश्वरी अउ मां बिंदेश्वरी ल घलोक आरोपी बनाय गए हे। बघेल उपर आरोप हावय कि उमन साडा सदस्य रहत पद के दुरुपयोग करके भिलाई-3 के मानसरोवर योजना म गलत तरीका ले अपन पत्नी अउ मां के नाम 6-6 प्लाट आवंटित करवाए हवय। ए मामला म बघेल अउ ऊंखर कुटुंब उपर 420, 120बी अउ भ्रष्टाचार अधिनियम के तहत मामला दर्ज करे गए हे।
भूपेश बघेल अपन ट्विटर एकाउंट म ये वीडियो अपलोड करे हे-

Post a Comment

0 Comments