देश के आजादी मं सिख समाज के योगदान अविस्मरणीय: श्री बृजमोहन अग्रवाल


  • कृषि मंत्री हर देवपुरी गुरूद्वारा मं करिस अमर शहीद भगत सिंह के प्रतिमा के अनावरण






रायपुर, 21 मई 2017। कृषि मंत्री श्री बृजमोहन अग्रवाल हर कहिन हे कि देश के आजादी, एकता अऊ अखण्डता बनाए रखे मं सिख समाज के योगदान ल ही-हमेशा गर्व के संग सुरता करे जाथे। श्री अग्रवाल आज इहां देवपुरी के गुरूद्वारा श्री गुरू अमरदास परिसर मं शहीद भगत सिंह के भव्य प्रतिमा के अनावरण समारोह ल सम्बोधित करत रहिन। छत्तीसगढ़ के पहिली शिक्षा मंत्री श्री सत्यनारायण शर्मा हर समारोह के अध्यक्षता करिन।
कृषि मंत्री श्री अग्रवाल हर कहिन कि सिख समाज के देश बर त्याग अऊ बलिदान के इतिहास रहे हे। हिन्दुस्तान ल गुलामी के जंजीर ले छोड़ाए मं सिख समाज के सैकड़ो योद्धा मन ह अपन प्राण के आहूति देहे हे। स्वतंत्रता के बाद देश ल अखण्ड बनाए रखे मं घलोक सिख जवान मन ह पूरा मुस्तैदी दिखात, बहादुरी के संग अपन कर्त्तव्य के निर्वहन करत हें। समाज अऊ देश बर शहादत के परम्परा सिख समाज ल हमेशा ऊंचा स्थान देवाथे। श्री अग्रवाल हर देवपुरी गुरूद्वारा मं अमर शहीद भगत सिंह के प्रतिमा लगे म सिख समाज ल बधाई अऊ शुभकामना दीन। उमन कहिन कि ये खुशी के बात हे कि सिख समाज ह आजादी के लड़ाई मं जान गंवइया अमर शहीद मन के अऊ गुरू परम्परा के श्रद्धा ले सुरता करत हे। समाज अऊ देश के महान विभूति मन के सुरता करत ऊंखर आदर्श मन म चलना हमर भारतीय संस्कृति के खास विशेषता हे।
समारोह के अध्यक्षता करत पूर्व शिक्षा मंत्री श्री सत्यनारायण शर्मा हर कहिन कि देश के आजादी के इतिहास सिख मन के कुर्बानि मन के गवाह हे। समाज के सहयोग ले गुरूद्वारा मं स्थापित शहीद भगत सिंह के प्रतिमा ह नउवा पीढ़ी ल एखर बलिदानी समाज के वीर जवान मन के सुरता देवाही। श्री शर्मा हर कहिन कि सिख धर्म मं गुरू मन ह अपन संदेश मं देश के रक्षा करे के सीख देहे हें। ए अवसर म श्री दिलीप सिंह होरा, श्री गुरमीत सिंह सैनी, श्री रणजीत सिंह सहित अमृतसर, विशाखापट्नम अऊ देश भर ले आए सिख समाज के मनखे उपस्थित रहिन।





Post a Comment

0 Comments