सिंचाई योजना मन के रूपांकित सिंचाई क्षमता के पूर्ण उपयोग सुनिश्चित करव : श्री बृजमोहन अग्रवाल

मनरेगा ले कुआँ, डबरी अऊ नहर लाईनिंग के काम प्राथमिकता से लेवव
कृषि अउ जल संसाधन मंत्री हर जिला स्तरीय समीक्षा बैठक मं दीन निर्देश


रायपुर, 6 मई 2017। कृषि अउ जल संसाधन मंत्री श्री बृजमोहन अग्रवाल हर जल संसाधन विभाग के अधिकारी मन से कहिन कि ओ मन सब्बो सिंचाई परियोजना मन के सर्वे कराके ओकर छोट-मोट कमी मन ल घलव दूर करके रूपांकित सिंचाई क्षमता के पूरा उपयोग कराना सुनिश्चित करव, ताकि सिंचाई सुविधा के लाभ जादा ले जादा किसान मन ल मिल सकय। उमन कहिन कि प्रधानमंत्री श्री नरेन्द्र मोदी के मंशा के जइसे साल 2022 तक किसान मन के आय दोगुनी करे के लक्ष्य ल पाय बर सबले पहिली सिंचाई क्षमता बढ़ाए ल परही। मनरेगा के तहत कुआँ, डबरी अऊ नहर सुधार आदि के काम जादा ले जादा कराए जाय चाही। अइसन कार्य से घलोक सिंचाई सुविधा बढ़ाए मं मदद मिलही। श्री अग्रवाल काल जिला मुख्यालय अंबिकापुर के जिला पंचायत के सभाकक्ष मं लोक सुराज अभियान के तहत जिला स्तरीय समीक्षा बैठक ल संबोधित करत रहिन। श्री अग्रवाल सरगुजा जिला के प्रभारी मंत्री हें। उमन बैठक मं कहिन कि सरगुजा जिला मं छोटे-बड़े 116 सिंचाई योजना संचालित हावे। ए सब्बो योजना मन के रूपांकित क्षमता के शत-प्रतिशत उपयोग होना चाही।
श्री अग्रवाल हर बैठक मं लोक सुराज अभियान 2017 ‘‘लक्ष्य समाधान‘‘ के तहत प्राप्त आवेदन पत्र अऊ ऊंखर निराकरण बर करे गए कार्रवाई मन के विभागवार विस्तार ले समीक्षा करत करत कहिन कि हितग्राही मूलक योजना मन ले जादा ले जादा लोगन ल लाभान्वित करे जाना चाही। उमन प्रधानमंत्री आवास योजना के तहत पात्र हितग्राही मन के सूची तैयार कर वर्षवार लक्ष्य निरधारित करे के निर्देश दीन। मजदूरी भुगतान के समीक्षा करत उमन कहिन कि एफ.टी.ओ. होए म मजदूर मन ल ऊंखर खाता मं राशि जमा होए के लिखित सूचना जरूरी रूप ले देहे जाय। खाद्य विभाग के अधिकारी मन ले कहिन कि जिखंर नाम राशन कार्ड मं जोड़े गये हावे या जिनला नवा राशन कार्ड देहे गये हावे ओ मन ल एही महिना ले उचित मूल्य दुकान के माध्यम ले राशन देवाना सुनिश्चित करव । जऊन राशन कार्ड धारी मन ल डुप्लीकेट राशन कार्ड देहे जात हावे ओ मन ल केवल एक दो पेज के फोटो कॉपी नइ देवव बल्कि राशन कार्ड के दूसर कॉपी देवव। श्री अग्रवाल हर प्रधानमंत्री उज्ज्वला योजना के तहत शिविर आयोजित कर गैस कनेक्शन अऊ सिलेण्डर वितरित कराए के निर्देश दीन। सिंचाई पम्प मन ल विद्युत कनेक्शन देहे बर जिला मं 397 सिंचाई पम्प मन ल मई महिना के आखरी तक कनेक्शन देवाना सुनिश्चित करे ल कहिन।
उमन ग्रामीण क्षेत्र मन मं पेयजल के व्यवस्था के समीक्षा करत लोक स्वास्थ्य यांत्रिकी विभाग के अधिकारी मन से कहिन कि सरगुजा जिला के 8 नल-जल योजना मन ल एक हफ्ता के अन्दर चालू करावव। हर विकासखण्ड मं हैण्डपम्प सुधारा बर मैकेनिक मन के व्यवस्था रखव जऊन गांव-गांव मं जाके हैण्डपम्प खराब होए म तुरंते मरम्मत करके चालू कर सकंय। कृषि मंत्री हर कहिन कि मुख्यमंत्री स्वास्थ्य बीमा योजना के तहत् सब्बो हितग्राहि मन ल स्मार्ट कार्ड मिलना चाही। श्री अग्रवाल हर आंगनबाड़ी केन्द्र मन मं वितरित करे जात रेडी टू ईट के गुणवत्‍ता म विशेष ध्यान देहे म जोर देवत रेडी टू ईट बनाए जाय वाले जघा मन म निगरानी रखे के निर्देश दीन। वन अधिकार पत्र वितरण के प्रगति के समीक्षा के समय उमन कहिन कि कोनो पात्र मनखे वन अधिकार पत्र प्राप्त करे ले छूट मत जाय। उमन रेत खदान मन के लीज देवत समय ये विशेष ध्यान दे के निर्देश देवत कहिन कि कोनो ल एनीकट, चेक डेम अऊ पुल-पुलिया आदि ले 100 मीटर के अन्दर रेत निकाले के अनुमति नइ दे जाय।
श्री अग्रवाल हर जल संसाधन विभाग कोति ले निर्माण कराये जात कई ठन जलाशय अउ व्यपवर्तन मन के विस्तार ले समीक्षा करिन। उमन जल संसाधन विभाग के अधिकारी मन से कहिन कि ओ मन अधिकांश निर्माण कार्य ल जून 2017 तक पूरा कराना सुनिश्चित करव। भू-अर्जन के प्रकरण मन ल समझौता के आधार म निराकरण करे के प्रयास करे जाना चाही। कृषि मंत्री हर अधिकारी मन ले कहिन कि सौर सुजला योजना के तहत एसी पम्प मन के बजाय डीसी पम्प ल कनेक्शन दे जाए अऊ एखर अनुशंसा कृषि विभाग के अधिकारी करव अउर क्रेडा के अधिकारी मन ल एखर से अवगत करावव। कलेक्टर श्री भीम सिंह हर लोक सुराज अभियान के तहत करे गे कार्रवाई के विस्तार ले जानकारी दीन। उमन अधिकारी मन से कहिन कि बैठक मं जिला प्रभारी मंत्री से दे गे निर्देश के अनुसार 15 दिन मं पालन-प्रतिवेदन प्रस्तुत करव। बैठक मं जिला पंचायत के अध्यक्ष श्रीमती फुलेश्वरी सिंह, कृषि विभाग के संचालक श्री एम.एस. केरकेट्टा, छत्‍तीसगढ़ बीज निगम के प्रबंध संचालक श्री आलोक अवस्थी, उद्यान विभाग के संचालक श्री नरेन्द्र पाण्डेय, छत्‍तीसगढ़ कृषि मण्डी बोर्ड के प्रबंध संचालक श्री नरेन्द्र शुक्ला संग सरगुजा जिला के सब्बो विभाग के जिला अधिकारी उपस्थित रहिन।

Post a Comment

0 Comments