अंतर्राष्ट्रीय योग दिवस के अवसर म राज्यपाल ह दीन शुभकामना

रायपुर, 20 जून 2017, राज्यपाल श्री बलरामजी दास टंडन ह अंतर्राष्ट्रीय योग दिवस के अवसर म प्रदेशवासी मन ल हार्दिक बधाई देहे हावंय। उमन अपन शुभकामना संदेश म कहे हावंय कि योग, उत्तम स्वास्थ्य बर एक अइसन जीवन पद्धति हे, जऊन मनुष्य ल निरोगी बनाथे। योग के ये प्राचीन परम्परा हमार देश के अमूल्य विरासत हे। योग के माध्यम ले मनुष्य अपन शरीर, मन अउ आत्मा म संतुलन स्थापित करके एकनिष्ठ, एकाग्र अउ स्थिर होथे अउ अंदर के शक्ति मन ल जागृत करथे। ये केवल व्यायाम नो हय बल्कि विज्ञान घलोक ये।
आधुनिक जीवन शैली, व्यस्तता, तनाव आदि के कारन कई ठन बीमारी आजकल बाढ़ गए हे। अइसे म योग रोग मन के उपचार म उपयोगी साबित होवत हावय। योग म हमार जीवन म सकारात्मक बदलाव लाय के असीम संभावना हावय। योग शरीर के सबो अंग मन म प्रभाव डालथे अउ ओमन ल सुचारू रूप ले संचालित करे म मदद करथे। योग ले जुरना विद्यार्थि मन बर घलोक लाभकारी हावय। योग एकाग्रता म कमी दूर करथे उन्‍हें विचार शक्ति ल बढ़ाथे। ये कईयोन प्रकार ले शरीर के दोष मन ल दूर करे म सहायक घलोक हावय। उमन नागरिक मन ले आह्वान करिन कि योग ल अपन जीवनशैली के अभिन्न अंग बनाव अउ रोग मन ले हमेशा दूर रहव अउ जीवन ल स्वस्थ अउ ऊर्जा ले भरपूर बनाव। 

Post a Comment

0 Comments