केन्द्र-राज्य के योजना मन ले जनता म उत्साह के वातावरण: डॉ. रमन सिंह


  • मुख्यमंत्री ह जनता ल इीस 223 करोड़ के विकास कार्य मन के सौगात
  • विशाल जनसभा म नगर पंचायत भवन संग पांच विद्युत सबस्टेशन घलोक होइस लोकार्पित
  • थानखम्हरिया म एसडीएम लिंककोर्ट अऊ धमधा म पुलिस अनुविभागीय कार्यालय के घोषणा
  • प्रधानमंत्री घर योजना म 200 परिवार मन ल मकान स्वीकृति पत्र अऊ उज्ज्वला योजना म 100 महिला मन ल रसोई गैस कनेक्शन वितरित


रायपुर, 24 जून 2017, मुख्यमंत्री डॉ. रमन सिंह ह कहे हें कि राज्य अऊ केन्द्र सरकार के जनकल्याणकारी योजना मन ले आम जनता के बीच विकास अऊ विश्वास के संग उत्साह के एक नवा वातावरण बने हे। प्रधानमंत्री श्री नरेन्द्र मोदी के नेतृत्व म भारत पूरा दुनिया म एक नवा पहिचान अऊ प्रतिष्ठा मिले हे। मुख्यमंत्री आज मंझनिया बेमेतरा जिला के विकासखण्ड मुख्यालय थानखम्हरिया म एक विशाल जनसभा ल सम्बोधित करत रहिन। कार्यक्रम म जनता ह उंखर आत्मीय अभिनंदन करिस। डॉ. सिंह ह ए अवसर म जिला के जनता ल पांच नवनिर्मित विद्युत सबस्टेशन मन संग करीबन 223 करोड़ रूपिया के 16 निर्माण कार्य मन के सौगात दीन। उमन एमां ले 20 करोड़ 28 लाख रूपिया के 11 पूरा हो गए निर्माण कार्य मन के लोकार्पण अऊ करीबन 203 करोड़ रूपिया के पांच नवा स्वीकृत निर्माण कार्य मन के भूमिपूजन अऊ शिलान्यास करिन। मुख्य अतिथि के आसंदी ले विशाल जनसभा ल सम्बोधित करत मुख्यमंत्री ह थानखम्हरिया म अनुविभागीय दण्डाधिकारी (एसडीएम) के लिंककोर्ट शुरू करवाए अऊ धमधा म पुलिस अनुविभागीय कार्यालय स्वीकृत करिन, बेमेतरा ले भैंसामुण्डा-घोटवानी सड़क निर्माण बर 13 करोड़ रूपिया अऊ दुर्ग ले धमधा-डोमा सड़क निर्माण बर तीन करोड़ रूपिया मंजूर करे के घोषणा करिन। डॉ. रमन सिंह ह कार्यक्रम म प्रधानमंत्री घर योजना के तहत 200 हितग्राही मन ल मकान स्वीकृति पत्र दीन अऊ प्रधानमंत्री उज्ज्वला योजना के तहत गरीब परिवार के 100 महिला मन ल रसोई गैस कनेक्शन, डबल बर्नर चूल्हा अऊ गैस सिलेण्डर मन के घलोक वितरण करिन। डॉ. सिंह ह एक सौ कुम्हार मन ल ऊंखर परम्परागत मिट्टी शिल्प बर बिजली ले चलइया चाक वितरित करिन। डॉ. सिंह ह जनता ल सम्बोधित करत कहिन- साल 2022 तक किसान मन के आमदनी दुगुनी करना अऊ प्रधानमंत्री घर योजना के तहत हर एक गरीब अउ घर विहीन कुटुंब ल मकान देवाना मोदी सरकार के सर्वोच्च प्राथमिकता हे। देश के पांच करोड़ गरीब परिवार के महिला मन ल चूल्हा के धुंगिया ले राहत देवाए बर प्रधानमंत्री उज्ज्वला योजना के तहत रसोई गैस कनेक्शन देहे जात हे। मुख्यमंत्री ह ये घलोक कहिन कि हर इंसान के जीवन ल सहज, सरल अऊ सुविधाजनक बनाना अऊ हर एक मनखे ल तरक्की के भरपूर अवसर देना सरकार के लक्ष्य हे। डॉ.रमन सिंह ह कहिन- छत्तीसगढ़ म घलोक राज्य अऊ केन्द्र सरकार के योजना मन ले समाज के आखरी छोर के मनखे मन तक विकास के अंजोर पहुंचे लगे हे। राज्य सरकार ह बेमेतरा संग साल 2012 म नौ नये जिला मन के गठन करे रहिस। ए सबो नवा जिला मन म जनता के सुविधा बर कलेक्टोरेट अऊ जिला पंचायत संग करिबन सबो जिला स्तरीय कार्यालय खुल गए हे। नवा जिला मन म विकास के कार्य तेजी ले होवत हे। मुख्यमंत्री ह थानखम्हरिया म आयोजित कार्यक्रम म जनता ल करीबन 223 करोड़ रूपिया के 16 निर्माण कार्य मन के सौगात दीन। मुख्यमंत्री के हाथ लोकार्पित निर्माण कार्य मन म 33/11 के.व्ही. क्षमता के पांच विद्युत सब स्टेशन घलोक सामिल हे। एकर बने म अब इलाका म बिजली के गुणवत्तापूर्ण आपूर्ति होए लगही। उमन जऊन विद्युत उपकेन्द्र मन के लोकार्पण करिन, ओखर निर्माण ग्राम गाड़ामोड़, कोबिया, हेमाबंद, कुसमी अऊ खिलोरा (रजकुड़ी) म करे गए हे। उमन ए मौका म 33/11 के.व्ही. क्षमता के तीन नवा स्वीकृत विद्युत उपकेन्द्र मन के घलोक भूमिपूजन करिन, जेकर निर्माण ग्राम हांटरांका, सोमईकला अऊ आनंदगांव म करे जाही। डॉ. सिंह ह तीन करोड़ 63 लाख रूपिया के लागत ले खम्हरिया अऊ करिबन दू करोड़ रूपिया के लागत ले रजकुड़ी म निर्मित एनीकट-सह-कॉजवे, दू करोड़ 37 लाख रूपिया के लागत ले घोटमर्रा म निर्मित स्टापडेम-सह रपटा अऊ 49 लाख 29 हजार रूपिया के लागत ले थानखम्हरिया म निर्मित नगर पंचायत भवन अऊ थानखम्हरिया बर तीन करोड़ 37 लाख रूपिया के शहरी आवर्धन जल प्रदाय योजना के घलोक लोकार्पण करिन। मुख्यमंत्री ह कार्यक्रम म दुर्ग-धमधा मुख्य मार्ग ले ग्राम देवरी-भिंभौरी होत बेमेतरा तक 96 करोड़ 77 लाख रूपिया के लागत ले अऊ ग्राम कारेसरा-खम्हरिया ले सिल्हाटी तक 99 करोड़ 81 लाख रूपिया के लागत ले बनइया सड़क मन के भूमिपूजन करिन।
उमन कार्यक्रम म कृषि, श्रम, पंचायत अऊ ग्रामीण विकास, खाद्य अऊ ग्रामोद्योग विभाग के कई ठन योजना मन के तहत बड़ संख्या म हितग्राही मन ल सामान अऊ अनुदान राशि के चेक वितरित करिन। श्रम विभाग के योजना के तहत मुख्यमंत्री ह असंगठित क्षेत्र के श्रमिक परिवार मन के 342 लइका मन ल नौनिहाल छात्रवृत्ति योजना के तहत पांच लाख 23 हजार रूपिया के चेक दीन। उमन श्रमिक परिवार मन के ही 80 मेधावी लइका मन ल शिक्षा प्रोत्साहन योजना के तहत दू लाख 32 हजार रूपिया के प्रोत्साहन राशि के वितरण करिन। मुख्यमंत्री ह जिला प्रशासन के कई ठन विभाग मन कोति ले आयोजित विकास प्रदर्शनी के घलोक अवलोकन करिन। कार्यक्रम म खाद्य, नागरिक आपूर्ति अऊ ग्रामोद्योग मंत्री अउ जिला के प्रभारी श्री पुन्नूलाल मोहले, सहकारिता, पर्यटन अऊ संस्कृति मंत्री श्री दयालदास बघेल, संसदीय सचिव श्री मोतीराम चंद्रवंशी, संसदीय सचिव अऊ क्षेत्रीय विधायक श्री लाभचंद बाफना, अध्यक्ष जिला पंचायत दुर्ग श्रीमती माया बेलचंदन, अध्यक्ष नगर पालिका बेमेतरा श्री विजय सिन्हा, उपाध्यक्ष जिला पंचायत बेमेतरा श्री दिलीप सिंह ठाकुर अऊ आन बहुत अकन वरिष्ठ जनप्रतिनिधि अउ कलेक्टर श्री कार्तिकेय गोयल अऊ जिला प्रशासन के बहुत अकन वरिष्ठ अधिकारी घलोक मौजूद रहिन। जनसभा ल खाद्य मंत्री श्री पुन्नूलाल मोहले अऊ संसदीय सचिव श्री लाभचंद बाफना ह घलोक सम्बोधित करिन।


Post a Comment

0 Comments