अंतर्राष्ट्रीय योग दिवस म छत्तीसगढ़ ह बनाइस विश्व कीर्तिमान


  • राज्य के 50 लाख मनखे मन के सामूहिक योग प्रदर्शन गोल्डन बुक ऑफ वर्ल्ड रिकार्ड म शामिल
  • मुख्यमंत्री ल सौंपे गीस विश्व कीर्तिमान के प्रमाण पत्र
  • स्वस्थ तन-मन ले ही होही स्वस्थ छत्तीसगढ़ अऊ स्वस्थ देश के निर्माण: डॉ. रमन सिंह  
  • मुख्यमंत्री के संग 600 स्कूली लइका मन ह करिन योगाभ्यास
  • बहुत अकन जनप्रतिनिधि, नागरिक अऊ वरिष्ठ अधिकारी घलोक होइन सामिल


रायपुर, 21 जून 2017, तीसर अंतर्राष्ट्रीय योग दिवस के अवसर म मुख्यमंत्री डॉ. रमन सिंह के नेतृत्व म आज बिहनिया छत्तीसगढ़ राज्य ह एक अनोखा विश्व कीर्तिमान बनाइस। मुख्यमंत्री के संग  राज्य के अंदाजन 50 लाख मनखे मन ह अलग-अलग जघा म एक संग योगाभ्यास करिन। प्रदेश के करीबन 11 हजार जघा म स्कूली लइका मन, सियान, जवान अऊ महिला मन संग समाज के जमो वर्ग ह पूरा उत्साह के संग योगाभ्यास करिन। 
मुख्यमंत्री डॉ. सिंह राजधानी रायपुर के बूढ़ातालाब (विवेकानंद सरोवर) के आघू इंडोर स्टेडियम म 600 स्कूली लइका मन के संग एक घण्टा तक सामान्य योग अभ्यास क्रम के अनुसार योग के कई ठन आसन के अभ्यास करिन। योग अभ्यास के ये कार्यक्रम छत्तीसगढ़ योग आयोग के अध्यक्ष श्री संजय अग्रवाल कोति ले करे गए रहिस। ए अवसर म छत्तीसगढ़ के सबो जिला मन म एक संग करीबन 50 लाख मनखे मन के योगाभ्यास के कीर्तिमान ल गोल्डन बुक ऑफ वर्ल्ड रिकार्ड म दर्ज करे गीस। कार्यक्रम म उपस्थित गोल्डन बुक ऑफ वर्ड रिकार्डस् के आब्जर्वर श्री संतोष अग्रवाल ह मुख्यमंत्री ल ए विश्व कीर्तिमान के प्रमाण पत्र सौंपिन। आयोजन म मुख्यमंत्री के संग स्कूली लइका मन के अलावा कई जनप्रतिनिधि मन अऊ शासन प्रशासन के वरिष्ठ अधिकारी मन ह घलोक योग अभ्यास करिन।

Post a Comment

0 Comments