लोकतंत्र के ज्योत हमेसा जलाए रखव: राज्यपाल श्री टंडन ह करिस आव्हान

लोकतंत्र सेनानी मन के सम्मान समारोह
मुख्यमंत्री ह करिस राज्यपाल के सम्मान
रायपुर, 26 जून 2017। मुख्यमंत्री डॉ. रमन सिंह ह आज इहां मेडिकल कॉलेज सभागार म आयोजित लोकतंत्र सेनानी मन के सम्मान समारोह म राज्यपाल श्री बलराम जी दास टंडन ल शाल, श्रीफल अऊ स्मृति चिन्ह भेट करके सम्मानित करिन। लोकतंत्र सेनानी संघ छत्तीसगढ़ अऊ लोकतंत्र प्रहरी संगठन कोति ले आयोजित ए कार्यक्रम म साल 1975 के आपातकाल के मीसाबंदी मन के घलोक सम्मान करे गीस। ये कार्यक्रम म राज्यसभा सांसद श्री प्रभात झा मुख्य वक्ता के रूप म सामिल होइन। मुख्य अतिथि श्री बलराम जी दास टंडन ह समारोह म कहिन कि लोकतंत्र के भावना जन-जन म हे। श्री टंडन ह मनखे मन ले लोकतंत्र के जोत ल हमेशा जलाए राखे के आव्हान करिन। उमन कहिन - लोकतंत्र के भावना जीवन के संग शुरू होथे। सच्चा लोकतंत्र म मनखे मन ल लिखे, बोलने के आजादी होथे। साल 1975 म आपातकाल के समय 19 महीना मनखे मन ल बोले, लिखे के स्वतंत्रता नइ रहिस। नेता अऊ नागरिक मन ल जेल म डाल दे गीस। अइसन एकर सेती करे गीस, ताकि आपातकाल के विरोध सामने मत आए। ए दौरान लोकतंत्र सेनानी मन अऊ ऊंखर परिवार ल बहुत अकन कठिनाई मन के सामना करना परिस। राज्यपाल श्री टंडन ह कहिन कि मोला खुशी हे कि लोकतंत्र के भावना ल बचाए रखे बर ए कार्यक्रम के आयोजन करे गीस। मुख्यमंत्री डॉ. रमन सिंह ह सम्मान समारोह म कहिन कि अवइया पीढ़ी लोकतंत्र सेनानी मन के संघर्ष ल हमेशा याद रखही। डॉ. सिंह ह कहिन - प्रदेश के राज्यपाल श्री टंडन खुद मीसाबंदी रहे हें। उमन भय अऊ आतंक के ओ दौर ल खुद देखे हें। श्री टंडन खुद लोकतंत्र के सेनानी हें। राज्य सरकार छत्तीसगढ़ के मीसाबंदी मन ल सम्मान निधि देवत हे। डॉ. रमन सिंह ह कहिन - आपातकाल के ओ दौर ल हम सबला ये संदेश मिले हे कि कहूं भविष्य म कभू अइसन दुर्भाग्य पूर्ण दौर आवय त सब मिलके ओखर प्रखरता ले प्रतिरोध करव। मुख्य वक्ता श्री प्रभात झा ह कहिन - जऊन प्रकार आजादी के आंदोलन म राष्ट्रपिता महात्मा गांधी ल याद करे जाथे, ठीक वइसनहे लोकतंत्र के रक्षा बर चलाए गए आंदोलन म लोकनायक स्वर्गीय श्री जयप्रकाश नारायण के योगदान ल हमेशा याद रखे जाही। ए अवसर म लोकतंत्र सेनानी संघ के राष्ट्रीय उपाध्यक्ष श्री सच्चिदानंद उपासने संग आन बहुत अकन वक्ता मन ह अपन विचार व्यक्त करिन। कार्यक्रम म विधानसभा अध्यक्ष श्री गौरीशंकर अग्रवाल, कृषि मंत्री श्री बृजमोहन अग्रवाल राज्यसभा सांसद श्री रामविचार नेताम अऊ पूर्व विधानसभा अध्यक्ष श्री धरमलाल कौशिक संग बहुत अकन वरिष्ठ जन उपस्थित रहिन। समारोह म राज्यपाल अऊ मुख्यमंत्री ह लोकतंत्र सेनानी के रूप म श्रीमती रजनी ताई उपासने, सर्वश्री मणिलाल चन्द्राकर, जयंत तापस, शिरोमणि राव घोरपड़े अऊ सुनील पुराणिक ल सम्मानित करिन।



Post a Comment

0 Comments