उद्यानिकी फसल मन बर मौसम आधारित फसल बीमा योजना लागू

सात फसल मन बीमा के दायरा म सामिल : बीमा के लाभ लेहे आधार कार्ड जरूरी

रायपुर, 24 जून 2017, छत्तीसगढ़ म अभी हाल के खरीफ मौसम म उद्यानिकी फसल मन बर मौसम आधारित फसल बीमा योजना लागू करे गइस हे। सात फसल मन- टमाटर, बैगन, अमरूद, केला, पपीता, मिर्चा अऊ अदरक ल बीमा योजना के दायरा म रखे गए हे। ये योजना ऋण लेवइया किसान मन बर जरूरी हे। अऋणी किसान अपन स्वेच्छा ले योजना के लाभ ले सकत हे। बीमा के लाभ लेहे बर आधार कार्ड जरूरी हे। राज्य शासन के कृषि विभाग कोति ले इहां मंत्रालय (महानदी भवन) ले ए आशय के अधिसूचना जारी कर दे गए हे। 
अधिसूचना के अुनसार किसान अपन सात निरधारित फसल मन के बीमा साझा सेवा केन्द्र (कॉमन सर्विस सेंटर) के माध्यम ले राज्य शासन से चुने गए कम्पनी बजाज एलायंस जनरल इंश्यूरेंस बीमा कम्पनी म 31 जुलाई तक करा सकत हे। योजना के अंतर्गत किसान मन ल सबसे जादा देय प्रीमियम बीमा राशि के पांच प्रतिशत या सही प्रीमियम जऊन येमा ले कम होवय, देना होही। बांचे प्रीमियम राशि 50-50 प्रतिशत के मान ले केन्द्र अऊ राज्य सरकार के तरफ ले अनुदान के रूप म दे जाही। किसान मन ल बीमा दावा राशि के भुगतान मौसमी गतिविधि मन म आए बदलाव के अनुसार प्रतिकूल परिस्थिति मन, जइसे कम तापमान, जादा तापमान, बेमौसम बरसात, वायु गति, बीमारी (कीट अउ ब्याधि) अनुकूल मौसम होए उपर करे जाही। किसान मन ल बीमा राशि के भुगतान अधिसूचना अनुसार दावा गणना करके संबंधित बीमा कम्पनी कोति ले बैंक के माध्यम ले करे जाही। 

Post a Comment

0 Comments