मुख्यमंत्री के असीस ले लावन्या के उच्च चिकित्सा संस्थान म होही इलाज

रायपुर, 22 जून 2017, मुख्यमंत्री डॉ. रमन सिंह के असीस ले बेमेतरा जिला के नवागढ़ निवासी श्रीमती कुसुम भोई के 22 महीना के बेटी लावन्या के दिल के इलाज उच्च चिकित्सा संस्थान म हो सकही। लावन्या के दिल म छेद हे अउ सांस नली म घलव समस्या हे। लावन्या के इलाज खातिर मुख्यमंत्री ह एकर पहिली मुख्यमंत्री बाल हृदय सुरक्षा योजना के अन्तर्गत डेढ़ लाख रूपए के स्वीकृति देहे रहिस, फेर जेन अस्पताल म लावन्या के इलाज हावइया रहिस हे, उहां के डॉक्टर मन बतादन कि उहां लावान्या के जटिल बीमारी के इलाज नइ हो सकय। रायपुर के बड़े अस्पताल मन के डॉक्टर मन घलव इही बात कहिन कि इलाज खातिर उमन ल बाहिर जाना परही। डॉक्टर मन बताइन कि लावन्या के इलाज म ज्यादा पइसा लगही। श्रीमती कुसुम भोई ह आज इहां जनदर्शन म मुख्यमंत्री से मुलाकात करके उमन ल अपन व्यथा सुनाईन। श्रीमती भोई ह बताइन कि उंखर पति श्री अजय भोई ठेला म भजिया अउ चाय बेचके कोनो तरह से परिवार चलात हे। मुख्यमंत्री ह श्रीमती भोई के समस्या सहानुभूतिपूर्वक सुनिन अउ संजीवनी कोष ले लावन्या के इलाज बर सहायता प्रदान करे के स्वीकृति दीन। श्रीमती भोई ह मुख्यमंत्री ल सहायता खातिर धन्यवाद दीस। श्रीमती भोई ह कहिस कि अब हमर बेटी के इलाज बड़े अस्पताल में हो सकेही। जनदर्शन म मुख्यमंत्री ह गंभीर बीमारी ले पीड़ित 22 मरीज मन के इलाज खातिर संजीवनी कोष ले स्वीकृति दीस। उंखर आदेश म 16 मरीज मन ल निःशुल्क इलाज बर रायपुर स्थित अम्बेडकर अस्पताल भेज गीस। जनदर्शन म लगाए डायबेटिक रिसर्च सोसायटी के स्टाल म 52 लोगन मन के मधुमेह के निःशुल्क परीक्षण करे गीस अउ मेडिकल कॉलेज के स्टाल म 31 मनखे मन के मधुमेह अउ सिकलिन परीक्षण करे गीस। उमन जनदर्शन म कई गांव वाले, जनप्रतिनिधि मन अउ प्रतिनिधि मंडल मन के आग्रह म 45 लाख रूपिया के लागत के बारा निर्माण कार्य मन के स्वीकृति घलव प्रदान करिन। 

Post a Comment

0 Comments