मुख्यमंत्री के जनदर्शन म उमडि़स जन सैलाब


  • सत्तर बछर बाद लीमपानी बनही राजस्व ग्राम
  • मुख्यमंत्री हर वनग्राम ल राजस्व ग्राम म बदले के दीन निर्देश
  • चरौदा-दादर बस्ती के गरीब परिवार मन के होही व्यवस्थापन
  • किडनी के मरीज मन के होही निःशुल्क इलाज


रायपुर, 15 जून 2017। मुख्यमंत्री निवास म तीन महीना बाद आज आयोजित जनदर्शन कार्यक्रम म अड़बड़ झन मनखे मन ह मुख्यमंत्री डॉ. रमन सिंह ले मुलाकात करिन अउ अपन मांग अउ समस्या मन से संबंधित आवेदन दीन। मुख्यमंत्री हर सबो प्रतिनिधि मंडल मन ल अउ व्यक्तिगत समस्या लेके आए मनखे मन ले मुलाकात करिन अउ उखंर समस्या मन के निराकरण करे के निर्देश संबंधित विभाग ल दीन। कोरबा जिला के पाली विकासखंड के वनग्राम नीमपानी के गांव वाले मन ह मुख्यमंत्री ले मुलाकात करके बताइन कि ओ मन 70 बछर ले वनग्राम म निवास करत हें अउ ओ मन ल वन अधिकार पत्र घलोक मिल चुके हावय, फेर वन ग्राम होए के कारण ओ मन ल बहुत अकन शासकीय योजना मन के लाभ नइ मिल पावत हे। मुख्यमंत्री हर वनग्राम नीमपाली ल राजस्व ग्राम म बदले के निर्देश कलेक्टर कोरबा ल दीन।
मुख्यमंत्री डॉ. सिंह मेरन नगर निगम भिलाई-चरौदा के चरौदा दादर बस्ती के मनखे मन ह मुलाकात करिन। उमन बताइन कि ओ मन पाछू 15 बछर ले बस्ती म झोपड़ी बनाके रहत हावंय, अब नगर निगम ह बरसात म उंखर झोपड़ी मन ल हटावत हावय, जेखर से बरसात म ओ मन ल दिक्कत होही। मुख्यमंत्री हर उंखर समस्या मन ल गौर से सुनिन अउ कलेक्टर दुर्ग ल ए सब्बो परिवार मन के उचित व्यवस्थापन करे के निर्देश दीन। अइसनहे कोरबा जिला के पाली विकासखंड के ग्राम पंचायत बतरा के गांव वाले मन ह मुख्यमंत्री से मुलाकात करके सरपंच अउ सचिव के खिलाफ आर्थिक अनियमितता के शिकायत करिन। मुख्यमंत्री ह एखर जांच के निर्देश कलेक्टर ल दीन।
छत्तीसगढ़ फिल्म विकास संघर्ष समिति के प्रतिनिधि मंडल हर घलोक मुख्यमंत्री डॉ. सिंह से मुलाकात कसि। प्रतिनिधि मंडल हर छत्तीसगढ़ी फिल्म मन ल जीएसटी से फ्री करे के मांग करिन। मुख्यमंत्री हर वित्त विभाग के प्रमुख सचिव ल एकर परीक्षण करके कार्रवाई करे के निर्देश दीन। आज के जनदर्शन म बड़ अकन मनखे मन ह व्यक्तिगत समस्या से संबंधित आवेदन पत्र दीन। येमा ज्यादातर आवेदन इलाज बर आर्थिक सहायता ले संबंधित रहिस। मुख्यमंत्री हर बिरगांव के राजेश कुमार, चमड़ा गोदाम रायगढ़ के श्रीमती प्रीति डेनियल, सिविक सेन्टर दुर्ग के मोतिन बाई देशमुख, ग्राम झिरिया तहसील सिमगा के कलाराम यादव, साहू बाड़ा बिलासपुर के चन्द्रमोली ल किडनी के इलाज बर संजीवनी कोष ले आर्थिक सहायता देहे के स्वीकृति प्रदान करिन।

Post a Comment

0 Comments