जोगी अपन चुनावी वादा के शपथ-पत्र जारी करही





रायपुर, जनता कांग्रेस छत्तीसगढ़ (जोगी) के एक बछर के सफर पूरा होए म पार्टी सुप्रीमो अजीत जोगी हर आज नवा अभियान के एलान करिस। ए अभियान के नाम ''जन-जन जोगी” रखे गए हे। आप मन जानतेच होहू कि, छै जून के दिनेच साल भर पहिली बिलासपुर के मरवाही विधानसभा के कोटमी मं पूर्व मुख्यमंत्री अजीत जोगी हर कांग्रेस छोड़े के बाद विशाल जनसमुदाय के बीच अपन नवा पार्टी बनाए के ऐलान करे रहिस हे। 21 जून ले शुरू होवइया ''जन-जन जोगी” अभियान मं अजीत जोगी खुद ह 10 लाख मनखे मन ले सीधा जुड़हीं। पार्टी प्रदेश के 50 लाख परिवार तक पहुंचे के हे। पहिली चरण मं 10 लाख के लक्ष्य रखे गए हे। ए कार्यक्रम के स्वरूप कार्यकर्ता मन तय करहीं, अभी तक के आंकड़ा के मुताबिक जोगी कांग्रेस ले जुड़े करीबन एक लाख कार्यकर्ता मन ल प्रशिक्षित करे गए हे। जेन मन 10 घर मं जाही अऊ जोगी कांग्रेस के नीति अऊ सिद्धान्त के बारे मे लोगन ल जानकारी देहीं।
ए अवसर म जोगी ह कहिस कि हमर पार्टी के अब तक के सफर अड़बड़ सफल रहे हे। जनजागरण हमर सबले बड़े सफलता हे। उमन कहिन हम 21 जून ले पार्टी जन-जन जोगी अभियान शुरू करबोन। येमां 2018 के चुनावी वादा ल नोटरी करा के शपथपत्र जारी करहूं ताकि में अपन वादा पूरा करे बर कानूनी रूप ले बाध्य रहिहूं। देश के इतिहास मं पहली पईत अइसन होही। कार्यकर्ता मन इही एफीडेविट ल धर के 10-10 घर मन मं जाहीं। बताए गए हे कि 21 जून के दिन ये शपथपत्र जारी होही।

Post a Comment

0 Comments