मतदाता सूची के शुद्धिकरण अउ नवा मतदाता मन के पंजीयन बर विशेष अभियान जारी

अवइया 31 जुलाई तक आयोजित अभियान म होही कई गतिविधी
रायपुर, 03 जुलाई 2017। भारत निर्वाचन आयोग के निर्देश के मुताबिक छत्तीसगढ़ म मतदाता सूची के शुद्धिकरण अउ पात्र नवा मतदाता मन के पंजीयन बर विशेष अभियान चलत हे। ये अभियान एक जुलाई ले शुरू हो गए हे अऊ 31 जुलाई 2017 तक चलही। 
कार्यालय मुख्य निर्वाचन पदाधिकारी ले मिले जानकारी के अनुसार ए अभियान के समय मतदाता सूची ले संबंधित बहुत अकन गतिविधि चलाए जाही। बूथ लेबल अधिकारी मन ले 31 जुलाई तक अपन मतदान क्षेत्र मन म घर-घर सर्वे करके आवेदक मन ले फार्म-6 जमा करे जाही।  विशेष रूप ले 18 ले 19 साल आयु समूह (21 साल के आयु) तक के छूट गए मतदाता मन (अपंजीकृत) ल प्राथमिकता देवत फार्म-6 प्राप्त करे जाही। 
आयोग के निर्देशानुसार राज्य म 09 जुलाई अऊ 23 जुलाई 2017 तक सबो मतदान केन्द्र स्तर म विशेष शिविर के आयोजन करे जाही। बूथ लेबल अधिकारी मन तीर विशेष शिविर के दिन अर्हता तारीक एक जनवरी 2017 के संदर्भ म प्रकाशित असली मतदाता सूची, अनुपूरक सूची संग सबो मतदान केन्द्र म रहिही, जेखर बूथ लेबल अधिकारी मन कोति ले वाचन करे जाही। इही प्रकार 08 जुलाई अउ 22 जुलाई के दिन शासकीय, अशासकीय शैक्षणिक संस्था (स्कूल, कॉलेज, आई.टी.आई. बी.एड कॉलेज, नर्सिंग संस्था अउ पॉलीटेक्निक कॉलेज मन) म शिविर के आयोजन करे जाही। 
विशेष अभियान कार्यक्रम म मृत मतदाता मन के नाम मतदाता सूची ले हटाए के कार्रवाई करे जाही। ए प्रक्रिया म सक्षम प्राधिकृत अधिकारी मन कोति ले जारी मृत्यु प्रमाण-पत्र या मृतक के संबंधि/पड़ोसी मन के तरफ ले भरे गए फार्म-7 के आधार म बूथ लेबल अधिकारी मन के रिपोट अउ इही क्षेत्र म रहइया दू गवाह मन के प्रमाण के आधार म प्रक्रिया के पालन करत अशुद्ध नांव मन ल मतदाता सूची ले विलोपित करे जाही। 
अधिकारी मन ह बताइन कि मतदाता अपन नाम मुख्य निर्वाचन पदाधिकारी कार्यालय छत्तीसगढ़ के वेबसाईट www.ceochhattisgarh.nic.in म खोज सकत हे। ए संबंध म कोनो प्रकार के जादा जानकारी बर मुख्य निर्वाचन पदाधिकारी कार्यालय रायपुर म स्थापित राज्य सम्पर्क केन्द्र के टोल फ्री नम्बर-1950 म कार्यालयीन समय म सम्पर्क करे जा सकत हें।

Post a Comment

0 Comments