रायपुर म खुलही गुजरात पर्यटन निगम के सूचना ब्यूरो

‘एक भारत-श्रेष्ठ भारत’ योजना के तहत समीक्षा बैठक
रायपुर, 27 जुलाई 2017। छत्तीसगढ़ के राजधानी रायपुर म गुजरात सरकार के पर्यटन विकास निगम के सूचना ब्यूरो खोले के तैयारी करे जात हे। प्रधानमंत्री श्री नरेन्द्र मोदी के महात्वाकांक्षी योजना ‘एक भारत श्रेष्ठ भारत’ के अंतर्गत गुजरात राज्य अऊ छत्तीसगढ़ राज्य, दूनों के कला, संस्कृति, खेल-कूद अऊ पर्यटन के कई ठन गतिविधि मन म आपसी भागीदारी निभावत हवंय। 
ये जानकारी इहां छत्तीसगढ़ सरकार के मंत्रालय (महानदी भवन) म आयोजित बैठक म दे गइस। छत्तीसगढ़ के संस्कृति, पर्यटन अऊ ग्रामोद्योग विभाग के सचिव श्रीमती निहारिका सिंह बारिक ह एक भारत श्रेष्ठ भारत योजना के तहत प्रदेश म चलत कार्यक्रम मन के समीक्षा करिन। ए अवसर म गुजरात राज्य पर्यटन निगम के प्रबंध निदेशक श्री जेनु देवन घलोक उपस्थित रहिन। श्री देवन ह ए अवसर म प्रस्तावित गुजरात के पर्यटन सूचना ब्यूरो बर इहां महंत घासीदास संग्रहालय परिसर स्थित छत्तीसगढ़ सरकार के गढ़ हटरी म स्थल निरीक्षण करिन। 
अधिकारी मन ह मंत्रालय म आयोजित बैठक म बताइन कि योजना के अंतर्गत होवइया आगामी कार्यक्रम मन म दुनों राज्य मन के युवा मन, स्कूल अउ कॉलेज के छात्र-छात्रा मन, लोक कलाकार मन अऊ किसान मन के सहभागिता सुनिश्चित करे जाही, जेखर ले दुनों राज्य के मनखे एक-दूसर के कला, संस्कृति, खेल-कूद, पर्यटन, कृषि अउ कला कृति मन के बारे म अऊ अच्छा ढ़ंग ले जान सकही। बैठक म गुजरात टूरिज्म कार्पोरेशन के प्रबंध संचालक ह बताइन कि छत्तीसगढ़ म गुजरात के एक टूरिज्म इनफारमेशन ब्यूरो खोले जाही। एखर लिए उमन संस्कृति अउ पुरातत्व संचालनालय परिसर स्थित गढ़ हटरी के स्थल निरीक्षण घलोक करे हें। आप मन जानतेच होहू कि ‘एक भारत-श्रेष्ठ भारत’ योजना के तहत गुजरात अऊ छत्तीसगढ़ सरकार दुनों राज्य के कला-संस्कृति, खेल, शिक्षा, कृषि, पर्यटन अऊ आन विभाग मन के बीच आपसी सहयोग बर अऊ सांस्कृतिक आदान-प्रदान बर कुछ महिना पहिली एक समझौता ज्ञापन म हस्ताक्षर करे गए रहिस हे। ये वाले एमओयू गुजरात के कच्छ इलाका म स्थित ढोरढो नामक स्थान म होय रहिस। एमओयू के तहत अब तक कई गतिविधि हो गए हे। 
आज के बैठक म छत्तीसगढ़ सरकार के समाज कल्याण विभाग के सचिव श्री सोनमणि बोरा, संचालक खेल अउ युवा कल्याण श्री अविनाश चम्पावत, छत्तीसगढ़ पर्यटन मंडल के प्रबंध संचालक श्री एम.टी. नंदी, संस्कृति अउ पुरातत्व विभाग के संचालक श्री आशुतोष मिश्रा अऊ संचालक हस्तशिल्प श्री एस.एल. धावडे़ संग आन अधिकारी उपस्थित रहिन।

Post a Comment

0 Comments