स्कूली छात्रा के लास ल ठेला म ले जाय के घटना : मुख्यमंत्री ह बहुत गंभीरता ले लीस​

अस्पताल के व्यवस्था म जरूरी सुधार के निर्देश
रायपुर, 03 जुलाई 2017। छत्तीसगढ़ के मुख्यमंत्री डॉ. रमन  सिंह ह राजनांदगांव के मेडिकल कॉलेज अस्पताल म सरकारी शव वाहन नइ मिले म एक स्कूली छात्रा के लास ल ओखर बाप ह ठेला म बस स्टैंड तक लेगीस, ये घटना ल बहुत गंभीरता ले लेहे हें। उमन राजनांदगांव जिला प्रशासन ल मेडिकल कॉलेज अस्पताल के व्यवस्था के समीक्षा करे अऊ जरूरी सुधार लाय के निर्देश दीन हें। डॉ. सिंह ह कहिन हें कि राज्य सरकार कोति ले मुक्तांजलि योजना शुरू करे गए हे। एखर अंतर्गत सरकारी अस्पताल मन ल 60 शव वाहन घलोक देहे गए हे, ताकि दिवंगत मन के पार्थिव शरीर ल सम्मानपूर्वक ऊंखर घर तक निःशुल्क पहुंचाए जा सकय। एखर अलावा शासकीय जिला अस्पताल मन अऊ सामुदायिक स्वास्थ्य केन्द्र मन म जनभागीदारी ले जीवन दीप समिती घलोक कार्यरत हे। समिति मन के माध्यम ले मरीज मन ल जरूरी बुनियादी सुविधा स्थानीय स्तर म देवाए जा सकत हे। मुख्यमंत्री ह सबो जिला कलेक्टर मन ल अपन-अपन जिला मन म सरकारी अस्पताल मन के व्यवस्था अऊ उहां के प्रबंधन के काम मन के नियमित समीक्षा करे अउ जीवन दीप समिति मन के बैठकें नियमित रूप ले आयोजित करे के घलोक निर्देश दीन हे। मेडिकल कॉलेज राजनांदगांव के घटना के तुरंते संज्ञान लेत कलेक्टर ह अधिकारी मन के बैठक लीस। उमन स्थानीय एस.डी.एम. ल प्रकरण के विस्तृत जांच के आदेश दीन हे। एखर संगेच  कलेक्टर ह मेडिकल कॉलेज अस्पताल म मरीज मन के सुविधा के लगातार ध्यान रखे बर एक डिप्टी कलेक्टर के घलोक ड्यूटी लगाए हे।

Post a Comment

0 Comments