मुख्यमंत्री के अध्यक्षता म राज्य आपदा प्रबंधन प्राधिकरण के बैठक

मुख्यमंत्री प्राकृतिक आपदा मन ले निपटे बर प्रभावी उपाय करे के दीन निर्देश
रायपुर, 06 जुलाई 2017। मुख्यमंत्री डॉ रमन सिंह के अध्यक्षता म आज इहां ऊंखर निवास कार्यालय म राज्य आपदा प्रबंधन प्राधिकरण के बैठक होइस। मुख्यमंत्री ह कहिन कि राज्य म बाढ़-अतिवृष्टि संग सबो प्रकार के प्राकृतिक आपदा मन ले बचाव बर प्रभावी उपाय करे जाय। आपदा ले निपटे बर उपकरण संग आन संसाधन मन के व्यवस्था सुनिश्चित करे जाय। जलस्तर उपर सतत निगरानी रखे जाय।
बैठक म बताए गीस कि राज्य म वर्षा अऊ ओखर ले उत्पन्न प्राकृतिक आपदा़ के बचाव बर राज्य स्तर अऊ जिला स्तर म 01 जून ले चौबीसों घण्टा कंटोल रूम के संचालन करे जात हे अऊ नोडल अधिकारी के नियुक्ति कर दे गए हे। अभी हाल म राज्य म आपदा ले निपटे बर बहुत अकन मोटर बोट, लाइफ जैकेट, सर्च लाइट, गमबुट, मनिला रोप तारपोलिन संग आन उपकरण देहे गए हे।
किसान मन के समस्या के समाधान बर जिला स्तर म किसान मितान केन्द्र स्थापित करे गए हे, जेमां राजस्व, कृषि ,सहकारिता, ग्रामीण विकास, सहकारी बैंक अउ जल संसाधन विभाग के अधिकारी मन ल सामिल करे गए हे। सबो जिला कलेक्टर मन ल किसान मन के समस्या मन के काउंसलिंग करके तुरंते निराकरण करे के निर्देश देहे गए हे। 
बैठक म अधिकारी मन ह जानकारी दीन कि साल 2015-16 म 117 तहसील सूखा ग्रस्त रहिस। ए तहसील मन ल फसल क्षति बर 512.81 करोड़ रूपिया के अनुदान सहायता राशि देहे गीस। संगेच ग्रामीण अउ नगरीय क्षेत्र मन म पेयजल बर 43.40 करोड़ रूपिया देहे गीस। साल 2016-17 म बेमेतरा जिला म तीन तहसील, मुंगेली जिला 01 तहसील, बलौदाबाजार जिला म 02 तहसील सूखा प्रभावित रहिस, जेला फसल क्षति बर अनुदान सहायता 64.17 करोड़ रूपिया प्रदाय करे गए हे। बैठक म नवगठित 09 जिला मन के जिला आपदा प्रबंधन योजना के अनुमोदन घलोक करे गीस। बैठक म राजस्व मंत्री श्री प्रेमप्रकाश पांडे, लोकसभा सांसद श्री विक्रम उसेंडी, विधायक श्री लखनलाल देवांगन, मुख्य सचिव श्री विवेक ढांड, राजस्व विभाग के प्रमुख सचिव श्रीमती रेणु पिल्ले, वित्त विभाग के प्रमुख सचिव श्री अमिताभ जैन, मुख्यमंत्री के संयुक्त सचिव श्री मुकेश बंसल उपस्थित रहिन।

Post a Comment

0 Comments