हरेली ले मिलथे हरियाली के रक्षा करे के प्रेरणा: डॉ. रमन सिंह

छत्तीसगढ़ के लोक जीवन के प्रमुख पर्व ‘हरेली’ म मुख्यमंत्री ह दीन बधाई अऊ शुभकामना

रायपुर, 22 जुलाई 2017। मुख्यमंत्री डॉ. रमन सिंह ह प्रदेशवासी मन ल कृषि प्रधान छत्तीसगढ़ के लोक जीवन के प्रमुख पर्व ‘हरेली’ के हार्दिक बधाई देहे हें। उमन ए मौका म सबो मनखे मन बर अपन शुभेच्छा प्रकट करे हें। डॉ. सिंह ह आज इहां जारी बधाई संदेश म कहिन कि बारिश अऊ खेती-किसानी के मौसम म सावन महीना के अमावस्या के दिन मनाए जाने वाला हरेली के तिहार सही म अपन नाम के जइसे हमार जीवन म ‘हरियाली’ के संदेश लेके आथे। 
उमन कहिन कि ए पर्व ले हमला अपन गांव, अपन शहर, अपन राज्य अऊ अपन देश म हरियाली के रक्षा बर जल-जंगल अऊ जमीन के रक्षा करे अऊ जादा ले जादा संख्या म वृक्षारोपण करे के प्रेरणा मिलथे। ये हमार जीवन म ‘हरियाली’ के महत्व ल घलोक प्रदर्शित करथे। डॉ. रमन सिंह ह कहिन कि किसान हरेली के दिन खेती बर उपयोगी नांगर, गैंती, फावड़ा आदि उपकरन मन के पूजा करथें, उहीं ए दिन बइला मन के घलोक पूजा करे जाथे, जऊन पशुधन के खातिर किसान मन के आत्मीय जुड़ाव के चिनहा हे। ये मेहनतकश किसान मन के आस्था, ऊंखर उत्साह अऊ विश्वास के घलोक एक प्रमुख पर्व आए। लइका अऊ युवा हरेली के दिन ‘गेड़ी’ के घलोक आनंद लेथें। 
मुख्यमंत्री ह हरेली के पावन अवसर म छत्तीसगढ़ संग पूरा देश म किसान मन के बेहतरी बर भगवान ले अच्छा बरसा अऊ अच्छा फसल के प्रार्थना करे हें। उमन सबो मनखे मन ला हरेली के दिन ‘हरियर छत्तीसगढ़’ वृक्षारोपण महा अभियान के भावना के संग  छत्तीसगढ़ ल हरा-भरा बनाए के संकल्प लेहे, जादा ले जादा संख्या म पौधा लगाये अऊ लगे पौधा मन के सुग्‍घर देखरेख करे के घलोक अपील करे हें।  

Post a Comment

0 Comments