सूरजपुर जिला के ग्राम कोल्हुआ म स्थिति नियंत्रण म

बुखार पीड़ित मन के सघन अऊ समुचित इलाज के व्यवस्था
कलेक्टर ह करिस गांव के दौरा: चिकित्सा शिविर के संगेच घरो-घर सर्वे

रायपुर, 29 जुलाई 2017। राज्य सरकार ह सूरजपुर जिला के ग्राम कोल्हुआ (विकासखण्ड-ओड़गी) म कई ठन कारण ले अलग-अलग तारीख मन म सात मनखे मन के आकस्मिक मृत्यु के सूचना ल संज्ञान म लेहे हे। स्वास्थ्य विभाग कोति ले गांव म बुखार पीड़ित मन के सघन अऊ समुचित इलाज के व्यवस्था करे गए हे। करीबन एक हजार 140 के जनसंख्या वाले ए गांव म 230 मकान हे। गांव म स्वास्थ्य विभाग कोति ले चिकित्सा शिविर लगाए गए हे। कलेक्टर सूरजपुर श्री के.से. देवसेनापति ह सूचना मिलतेच खुदे ए गांव म पहुंचके स्थिति के जायजा लीन। स्वास्थ्य विभाग कोति ले लउहे उठाए गए कदम के फलस्वरूप गांव म अब स्थिति नियंत्रण म आ गए हे। सर्वेक्षण के संगें-संग ग्राम कोल्हुआ संग आसपास के गांव मन म घलोक मच्छर नाशक दवाई के युद्धस्तर म छिड़काव करे जात हे। 
नया रायपुर स्थित स्वास्थ्य संचालनालय के अधिकारी मन ह आज बताइन कि ग्राम कोल्हुआ म 23 जुलाई ले 27 जुलाई के बीच अलग-अलग तारीख म बुखार के कारन पांच मनखे मन के मौत हो गीस, जबकि 22 वर्षीय एक महिला के मृत्यु प्रसव के बाद अऊ 62 वर्षीय एक महिला के मृत्यु वृद्धावस्था के कारण स्वाभाविक रूप ले होइस हे। स्वास्थ्य संचालनालय के अधिकारी मन ह आज बताइन कि ग्राम कोल्हुआ म ए मौत मन के सूचना मिलतेच सूरजपुर के मुख्य चिकित्सा अऊ स्वास्थ्य अधिकारी कोति ले उहां मेडिकल टीम भेजे गइस, जेमां सामिल चिकित्सा कर्मी मन ह घर-घर जाके 149 मनखे मन के स्वास्थ्य परीक्षण करिन। एमां ले 39 मनखे बुखार ले पीड़ित पाए गीन, ऊंखर खून के जांच म 11 पीएफ के पाजीटिव मरीज मिलिन। कर्त्तव्य के प्रति लापरवाही के शिकायत मिले म सूरजपुर कलेक्टर ह दो स्वास्थ्य कार्यकर्ता मन ल तुरंते प्रभाव ले निलंबित कर देहे हें। 
अधिकारी मन ह बताइन कि जिला मलेरिया अधिकारी डॉ. आर.एस. सिंह अऊ चिकित्सा अधिकारी डॉ. सिद्धीकी कोति ले पैरा मेडिकल कर्मचारि मन के संग गांव म शिविर लगाके मरीज मन के इलाज करे जात हे। स्वास्थ्य विभाग के अधिकारी मन अऊ कर्मचारी मन से घरो-घर सघन सर्वेक्षण करत हें। सर्वेक्षण के समय सात मनखे मन के मृत्यु के जानकारी मिले हे। एमां ले डेढ़ साल के शिरपति (पिता श्री रामसागर) के 23 जुलाई को, छह साल उम्र के शांति (पिता श्री शंकर दयाल) के 24 जुलाई को, सात साल के नमिता (पिता श्री उमेश्वर) के 27 जुलाई को, सात साल के रोहित (पिता श्री रामविलास) के 27 जुलाई को अऊ दस साल के रीता (आत्मज श्री शंकर) के घलोक 27 जुलाई को बुखार के सेती मृत्यु होना पाए गीस, जबकि 22 वर्षीय श्रीमती फूलमति के मृत्यु 25 जुलाई को प्रसव के उपरांत हो गीस। ओ मन ल गर्भावस्था के कारण बैढ़न के अस्पताल म 25 जुलाई को भर्ती करे रहिन। एकर अलावा 62 वर्षीय श्रीमती बिट्टी बाई के वृद्धावस्था के कारण स्वाभाविक मृत्यु हो गीस। ग्राम कोल्हुआ उपस्वास्थ्य केन्द्र मोहली अऊ प्राथमिक स्वास्थ्य केन्द्र बिहारपुर के आश्रित गांव हे। कोल्हुआ म दू मितानिन कार्यरत हें, ऊमन ल प्राथमिक उपचार बर बहुत अकन दवाई देहे गए हे।

Post a Comment

0 Comments