हमर छत्तीसगढ़ योजना : मुख्यमंत्री ले पंचायत प्रतिनिधि मन करिन सौजन्य मुलाकात

रायपुर, 19 जुलाई 2017। मुख्यमंत्री डॉ रमन सिंह ले आज संझा इहां ऊंखर निवास परिसर म हमर छत्तीसगढ़ योजना के अंतर्गत राजधानी रायपुर अऊ नवा रायपुर के अध्ययन भ्रमण म जांजगीर-चांपा जिला ले आए पंचायत प्रतिनिधि मन ह सौजन्य मुलाकात करिन। मुख्यमंत्री ह ओ मन ल सम्बोधित करत कहिन कि ये दू साल के एक अइसन योजना हे, जेमां 27 जिला मन के ग्रामीण जनप्रतिनिधि राजधानी आहीं। योजना के पहली साल 30 जून के दिन पूरा हो गए हे। राजधानी अवइया पंचायत प्रतिनिधि मन ल छत्तीसगढ़ के विकास ल जाने अऊ शासन-प्रशासन के कार्यप्रणाली ले परिचित होए के मौका मिलत हे। उमन कहिन कि एक समय छत्तीसगढ़ ल पिछड़ा राज्य कहे जात रहिस, अब छत्तीसगढ़ विकास के राह म तेजी ले निरंतर आगू बढ़त हे। उमन पंचायत प्रतिनिधि मन ल राज्य शासन के बहुत अकन कल्याणकारी योजना मन के जानकारी दीन। उमन कहिन कि मुख्यमंत्री स्वास्थ्य बीमा योजना के तहत चुने गए अस्पताल मन म एक साल म 30 हजार रूपिया तक के निःशुल्क इलाज के सुविधा सबो नागरिक मन ल देहे जात हे। उज्ज्वला योजना म सिरिफ 200 रूपिया के पंजीयन शुल्क म गैस कनेक्शन देहे जात हे। उमन ग्रामीण जनप्रतिनिधि मन ले आव्हान करिन कि ओ मन सरलग अच्छा काम करंय अऊ जनता के बीच जाके सेवा करंय। ए अवसर म विधायक डॉ. खिलावन साहू घलोक उपस्थित रहिन।

Post a Comment

0 Comments