प्रदेश के सबो ज़िला मन म जनभागीदारी ले बनही ऑक्सीजोन : डॉ. रमन सिंह

  • मुख्यमंत्री स्कूली लइका मन अऊ आम जनता के संग सामिल होइन वन महोत्सव म
  • हरियर छत्तीसगढ़ के तहत प्रदेशव्यापी वृक्षारोपण महाअभियान के मुख्यमंत्री ह करिस शुभारंभ
  • राज्य म 8.02 करोड़ पौधा लगाय के लक्ष्य : अगस्त महिना म घलोक चलही अभियान
  • लगाए गए पौधा मन के जानकारी वेबसाईट म प्रदर्शित करे जाही: मुख्यमंत्री
रायपुर, 20 जुलाई 2017। मुख्यमंत्री डॉ. रमन सिंह ह राज्य के सबो जिला मन म पर्यावरण के स्वच्छता, शुद्धता अऊ सुरक्षा बर जनभागीदारी ले ऑक्सीजोन विकसित करे के घोषणा करे हे। मुख्यमंत्री ह आज मंझनिया नवा रायपुर के ग्राम थनौद म हरियर छत्तीसगढ़ योजना के तहत प्रदेश व्यापी वृक्षारोपण महा अभियान के शुभारंभ करत वन महोत्सव म ये वाले घोषणा करिन। प्रदेश के नागरिक कहूं अपन तीन ले पांच एकड़ तक जमीन म ऑक्सीजोन बनाना चाहत हें, त एखर बर वन विभाग म अपन पंजीयन करवा सकत हें। अइसने कहूं कोनो नागरिक खुद के दस एकड़ जमीन म ले एक एकड़ म वृक्षारोपण करना चाहे, त एखर बर घलोक सरकार ओला पौधा देही। उमन वृक्षारोपण कार्यक्रम म सबो मनखे मन ल जुरे के अपील करे हें।
उमन समारोह म कहिन कि जब तक पृथ्वी म वृक्ष हे, तब तक जीवन हे। प्रकृति ह पेड़-पौधा मन ल मानव जीवन के हिसाब ले बनाय हे। पेड़ लगइया ल मनखे कई पीढ़ी तक याद रखथें। उमन कहिन-वृक्ष मन ले हमला जीवन रक्षक शुद्ध ऑक्सीजन मिलथे, छइंहा मिलथे अऊ रंग-रंग के पौष्टिक फल घलोक मिलथे। ए खातिर जऊन वृक्ष मन के रक्षा करथे, वृक्ष ओखर रक्षा करथे। डॉ. सिंह ह कहिन कि आज पूरा दुनिया म पर्यावरण ल लेके चिन्ता व्यक्त करे जात हे। जादा ले जादा पेड़ लगाके अऊ वन मन के रक्षा करके हम पर्यावरण संरक्षण म अपन योगदान दे सकत हन। उमन कहिन छत्तीसगढ़ म करीबन 42 प्रतिशत जंगल हे। राज्य ल अऊ जादा हरा-भरा बनाए के जरूरत हे।
डॉ. सिंह ह एखर बर हरियर छत्तीसगढ़ वृक्षारोपण महा अभियान म सबो मनखे मन ल जुरे के आव्हान करिस। उमन ए बात म खुशी जताईन कि आज थनौद म आयोजित वृक्षारोपण समारोह म अड़बड़ अकन स्कूल के लइका मन संग आम जनता ह घलोक उत्साह के संग कई ठन प्रजाति के पौधा लगाइन।
उमन समारोह ल सम्बोधित करत कहिन कि प्रदेश भर म आज 8.02 करोड़ पौधा लगाए के जऊन अभियान शुरू होय हे, वो वन महोत्सव के रूप म अवइया महिना अगस्त म घलोक जारी रहिही। सबके सहयोग ले पौधा लगाए जाही। कोन जिला म कतका पौधा लगाए गए हे, ओखर जानकारी वेबसाईट म घलोक प्रदर्शित करे जाही। डॉ. सिंह ह सबो मनखे मन ल लगाए गए पौधा मन के बढि़या देखरेख करे के घलोक अपील करिन। उमन कहिन कि नवा रायपुर म करीबन 32 प्रतिशत हरित क्षेत्र विकसित करे जात हे। येमा कई ठन प्रजाति के पौधा लगाए गए हे।
उल्लेखनीय हे कि चालू मानसून के समय मुख्यमंत्री डॉ. रमन सिंह ह जइसे घोषणा करे रहिस वइसनहे राज्य म हरियर छत्तीसगढ़ वृक्षारोपण महाभियान के तहत आठ करोड़ 02 लाख पौधा लगाय के कार्यक्रम आज ले शुरू हो गीस। मुख्यमंत्री ह नवा रायपुर स्थित ग्राम थनौद म छात्र-छात्रा मन, गांव वाले मन अऊ आम नागरिक मन के संग ए अभियान के शुभारंभ करिस। महोत्सव म दस हेक्टेयर के रकबा म कई ठन प्रजाति के सात हजार पौधा रोपे जाही। एमां आमा के 2500, आंवला के 1000, मुनगा के 1000, कटहल के 500, बहेड़ा के 500, बेल के 400, सीताफल के 100, कहुवा के 100, नीम के 200, महुआ के 500, जामुन के 100, अमरूद के 100 पौधा सामिल हे। डॉ. सिंह ह थनौद म केन्द्रीय रिजर्व पुलिस बल (सीआरपीएफ) कैम्प तीर महानदी मुख्य नहर के किनारे नहर वृक्षारोपण अभियान के घलोक शुभारंभ करिस। एखर अंतर्गत नहर के दुनों किनारा म एक किलोमीटर के लम्बाई म तीन हजार पौधा लगाए जाही। अवइया तीन साल म ए नहर के दुनों बाजू कुल 64 किलोमीटर के लम्बाई म वृक्षारोपण करे जाना प्रस्तावित हे।
राज्य सरकार ह हरियर छत्तीसगढ़ वृक्षारोपण महाभियान के तहत ए साल आठ करोड़ 02 लाख पौधा लगाय बर विभागवार लक्ष्य घलोक आवंटित कर देहे हे। सबले जादा छह करोड़ 08 लाख पौधा वन विभाग ले, 81 लाख पौधा वन विकास निगम ले, 25 लाख पौधा गृह अऊ पर्यावरण विभाग ले अऊ 45 लाख पौधा कृषि विभाग कोति ले लगाय के लक्ष्य हे। महिला अऊ बाल विकास विभाग ल चार लाख, नगरीय प्रशासन विभाग ल दू लाख, आदिम जाति विकास विभाग ल एक लाख, लोक स्वास्थ्य यांत्रिकी विभाग ल एक लाख, खाद्य विभाग अऊ स्कूल शिक्षा विभाग ल घलोक एक-एक लाख पौधा लगाय के लक्ष्य दे गए हे।

मुख्यमंत्री ह डॉ. रामचन्द्र सिंहदेव के करिस स्वागत
मुख्यमंत्री ह आज के समारोह म उपस्थित प्रदेश के पहिली वित्त मंत्री डॉ. रामचन्द्र सिंहदेव के विशेष रूप ले उल्लेख करिस। डॉ. सिंह ह उंखर स्वागत करत कहिन कि डॉ. रामचन्द्र सिंहदेव प्रदेश के वरिष्ठ नेता होए के अलावा पेड़-पौधा मन बर चिन्ता करइया अउ समाज म पर्यावरण बर जागरूकता लाय बर हमेशा प्रयासरत रहिथें। उमन अपन पूरा जीवन पर्यावरण जागरूकता बर समर्पित कर रखे हें।

सबो अतिथि मन ल भेंट करिस एक-एक गुलाब के फूल
समारोह म मुख्यमंत्री संग सबो अतिथि मन के स्वागत पुष्प गुच्छ के जघा गुलाब के एक-एक फूल भेंटकर के करिस। वनमंत्री श्री महेश गागड़ा, राज्य वित्त आयोग के अध्यक्ष श्री चन्द्रशेखर साहू, राज्य सहकारी बैंक के अध्यक्ष श्री अशोक बजाज, वनौषधि बोर्ड के अध्यक्ष श्री रामप्रताप सिंह, वन विकास निगम के अध्यक्ष श्री श्रीनिवास मद्दी, आरंग के विधायक श्री नवीन मारकण्डेय अऊ क्षेत्र के कई ठन ग्राम पंचायत मन के पंच-सरपंच अउ बड़ अकन नागरिक उपस्थित रहिन। मुख्य सचिव श्री विवेक ढांड अऊ वन विभाग अउ आन संबंधित विभाग मन के वरिष्ठ अधिकारी घलोक कार्यक्रम म मौजूद रहिन। 

मुख्यमंत्री ह दीस मुनगा खाए के सलाह
डॉ. रमन सिंह ह वन महोत्सव म आज लगाए गए मुनगा के पौधा मन के उल्लेख करत कहिन कि एखर फल म काफी मात्रा म आयरन होथे, जऊन शरीर म खून के कमी ल घलोक दूर करथे। मनखे मन ल अपन घर के बाड़ी म मुनगा के पेड़ जरूर लगाना चाही।  मुनगा अड़बड़ पौष्टिक होथे। उमन सबो मनखे मन ल मुनगा खाए के सलाह दीन। 

Post a Comment

0 Comments