स्कूल शिक्षा मंत्री श्री कश्यप के अध्यक्षता म राज्य स्तरीय समीक्षा बैठक

जिला शिक्षा अधिकारी मन ल दीन निर्देश
रायपुर, 21 जुलाई 2017। स्कूल शिक्षा मंत्री श्री केदार कश्यप ह आज इहां छत्तीसगढ़ माध्यमिक शिक्षा मंडल के सभा कक्ष म जमो जिला शिक्षा अधिकारी अउ जिला परियोजना समन्वयक मन के समीक्षा बैठक लीन अऊ कई ठन शासकीय विभागीय योजना मन के काम-काज के जानकारी लीन। उमन जमो उपस्थित अधिकारी मन ल गुणवत्ता पूर्ण काम समय-सीमा म पूरा करे के निर्देश दीन अऊ कहिन कि योजना मन के क्रियान्वयन म कोनो शिकायत नइ आनी चाही। 
श्री कश्यप ह अधिकारी मन ले स्कूल मन म लइका मन के प्रवेश के स्थिति, सरस्वती सायकल योजना, पाठ्य पुस्तक अउ गणवेश वितरण, मध्यान्ह भोजन योजना, स्कूल मन म शिक्षक मन के उपलब्धता, शिक्षक मन के पदोन्नति प्राथमिक, मिडिल, हाई स्कूल अउर हायर सेकेण्डरी स्कूल मन म प्राचार्य मन के स्वीकृत, कार्यरत अउ खाली पद मन के जानकारी, स्कूल मन के भवन निर्माण, स्कूल मन के जीर्ण शीर्ण होए म मरम्मत के जरूरत, स्‍कूल मन के बाउण्डरी वाल, सरस्वती सायकल वितरण सत्र 2014-15 म आवंटन लेप्स होए अऊ आन विभागीय योजना मन के जिलेवार करे काम-काज के जानकारी लेत पूरा नइ होए अउ अधूरा काम लउहे पूरा करे के, अधिकारी मन ल निर्देस दीन। 
श्री कश्यप ह कहिन कि स्कूल खुले तीन महिना पूरा हो गए हे। तय सीमा के भीतर योजना के सही क्रियान्वयन होही। विद्या मितान के भर्ती ओखर शैक्षिक योग्यता अउ ऊंखर मानिटरिंग के जरूरत के बारे म चर्चा करिन। श्री कश्यप ह सरस्वती सायकल वितरण उपर फोकस करत कहिन कि अभी हाल सत्र के अउ जुन्‍ना सायकल के का स्थिति हे। कोन-कोन जिला मन म अभी तक सप्लाई शुरू नइ होए हे। सायकल के डिलिवरी के हर एक दिन मॉनिटरिंग अउ गुणवत्ता के जांच के सत्यापन के बारे म घलोक सबो अधिकारी मन ल उमन निर्देशित करिन। ए अवसर म स्कूल शिक्षा सचिव श्री विकास शील, लोक शिक्षण संचालक श्री यश प्रकाश अउ सबो जिला मन ले आए जिला शिक्षा अधिकारी अऊ जिला परियोजना समन्वयक प्रमुख रूप ले उपस्थित रहिन।

Post a Comment

0 Comments