मुख्यमंत्री के अध्यक्षता म निगम-मंडल मन के पदाधिकारी मन के बैठक

श्रमिक मन बर दीनदयाल श्रम अन्न सहायता योजना के होही विस्तार
सिरिफ पांच रूपिया म श्रमिक मन ल मिलही गर्म अऊ ताजा भोजन
कर्मकार कल्याण मंडल कोति ले 14 अगस्त ल उरला अऊ तेलीबांधा म करे जाही योजना के शुभारंभ

रायपुर, 27 जुलाई 2017। मुख्यमंत्री डॉ. रमन सिंह ह आज रात इहां अपन निवास कार्यालय म प्रदेश के सबो निगम अऊ मंडल मन के अध्यक्ष मन अऊ उपाध्यक्ष मन के बैठक लीन। उमन मैराथन बैठक म ढाई घण्टा ले जादा समय तक ऊंखर संग कई ठन विषय मन म विचार-विमर्श करिन। डॉ. सिंह ह कहिन कि ओ मन छै महीना म निगम-मंडल मन के अध्यक्ष मन अऊ उपाध्यक्ष मन के संग बैठक करहीं। आज के बैठक म डॉ. सिंह ह ओ मन ल देश के कई ठन राज्य मन के दौरा करे अऊ उहां के सार्वजनिक उपक्रम मन म अपनाए जात सबले अच्‍छा नवाचार मन के अध्ययन करे के सलाह दीन। डॉ. सिंह ह कहिन कि मैं खुद ए सिलसिला म बरसा के बाद आंध्रप्रदेश अऊ तेलांगाना जाहूं। 

छत्तीसगढ़ भवन अउ आन सन्निर्माण कर्मकार कल्याण मंडल कोति ले राजधानी रायपुर के गांधी मैदान स्थित चावडी अऊ तेलीबांधा म असंगठित मजदूर मन बर दीनदयाल श्रम अन्न सहायता योजना संचालित करे जात हे। मुख्यमंत्री ह एकर विस्तार पहिली चरण म छत्तीसगढ़ के आठ जिला मन के शहर मन म करे के निर्देश दीन। एमां रायपुर, दुर्ग, राजनांदगांव, कबीरधाम, बिलासपुर, जांजगीर-चांपा, बस्तर (जगदलपुर), सरगुजा, कोरिया अऊ रायगढ़ सामिल हे। ए योजना के तहत चावड़ी म जिहां श्रमिक काम के तलाश म एक जघा सकलाथें, ओ जघा म उंखर पंजीयन करे जाही अऊ ओ मन ल रोज बिहनिया आठ बजे ले 11 बजे तक गरम खाना देहे जाही। रायपुर शहर म ए योजना के तहत 15 हजार श्रमिक मन ल सिरिफ पांच रूपिया म गरमा-गरम दाल, भात, मौसमी सब्जी, अचार, पापड़ अऊ सलाद दे जाही। ओ मन ल टिफिन म घलोक इही भोजन ले जाय के सुविधा मिलही। कर्मकार कल्याण मंडल कोति ले राजधानी रायपुर म ये योजना श्रमिक बहुल उरला, भनपुरी अऊ बोरियाखुर्द म घलोक शुरू करे जाही। रमन सरकार के कार्यकाल के पहिली पांच हजार दिन पूरा होए के उपलक्ष्य म एमां ले तेलीबांधा अऊ उरला म 14 अगस्त को योजना के शुभारंभ करे जाही। डॉ. रमन सिंह ह कहिन कि मैं खुद अइसन कोनो एक जघा म श्रमिक मन के संग भोजन करहूं। मुख्यमंत्री ह अधिकारी मन ल ए योजना म जादा ले जादा समाज सेवी संस्था मन के भागीदारी सुनिश्चित करे के घलोक निर्देश दीन। 

छत्तीसगढ़ राज्य सहकारी बैंक (अपेक्स बैंक) के अध्यक्ष श्री अशोक बजाज ह सहकारी समिति मन के माध्यम ले किसान मन ल शून्य ब्याज दर म दे जात ऋण सुविधा के प्रगति के बारे म बताइस। एखर अलावा उमन अपेक्स बैंक के माईक्रो एटीएम योजना के घलोक जानकारी दीन। डॉ. रमन सिंह ह ओ मन ल ए योजना के प्रदेश भर म विस्तार करे के निर्देश दीन। डॉ. सिंह ह श्री बजाज ले ये घलोक कहिन कि सहकारी बैंक मन के नवनिर्वाचित पदाधिकारी मन बर प्रशिक्षण कार्यक्रम के अऊ सम्मेलन के आयोजन करे जाए। रायपुर विकास प्राधिकरण के अध्यक्ष श्री संजय श्रीवास्तव ह कमल विहार आवासीय परियोजना के प्रगति के बारे म बताइस। उमन ये घलोक जानकारी दीन कि आरडीए कोति ले कमजोर आय वर्ग के मनखे मन बर छोटे आकार के आवासीय भू-खण्ड घलोक विकसित करे जात हे। एखर अलावा फूलचौक स्थित आरडीए परिसर के बाजार म पार्किंग आदि के सुविधा बेहतर ढंग ले विकसित करे के योजना बनाय गए हे। बैठक म छत्तीसगढ़ गौसेवा आयोग के अध्यक्ष श्री बिशेषर यादव ह बताइस कि आयोग कोति ले प्रदेश के गौशाला मन के संरक्षण अऊ संवर्धन बर कई प्रस्ताव तैयार करे गए हे। गौशाला मन ल आत्मनिर्भर बनाए के दिशा म प्रयास करे जावत हे। डॉ. सिंह ह कहिन कि प्रदेश के गौशाला मन म पंचगव्य बनाए के प्रशिक्षण घलोक दे जाना चाही। 
बैठक म छत्तीसगढ़ पाठ्यपुस्तक निगम के अध्यक्ष श्री देवजी भाई पटेल, भण्डर गृह निगम के अध्यक्ष श्री नीलू शर्मा, छत्तीसगढ़ राज्य सहकारी विपणन संघ (मार्कफेड) के अध्यक्ष श्री राधाकृष्ण गुप्ता, मदरसा बोर्ड के अध्यक्ष श्री सलीम अशरफी, खनिज विकास निगम के अध्यक्ष श्री शिवरतन शर्मा, माटी कला बोर्ड के अध्यक्ष श्री गजानन पांड़े, बीज अउर कृषि प्रक्षेत्र विकास निगम के अध्यक्ष श्री श्याम बैस, पर्यटन मंडल के उपाध्यक्ष श्री केदार गुप्ता, वनौषधि बोर्ड के अध्यक्ष श्री रामप्रताप सिंह, उपाध्यक्ष श्री जे.पी. शर्मा, निःशक्तजन आयोग के अध्यक्ष श्रीमती सरला जैन, मछुआरा कल्याण बोर्ड के अध्यक्ष श्री मटियारा, वन विकास निगम के अध्यक्ष श्री श्रीनिवास मद्दी घलोक उपस्थित रहिन। 

Post a Comment

0 Comments