मुख्यमंत्री ह रेल्वे अंडर ब्रिज के करिन लोकार्पण

मोतीपुर-बजरंगपुर-नवागांव सड़क म सुविधाजनक होवय आवागमन: डॉ. रमन सिंह
रायपुर, 21 जुलाई 2017। मुख्यमंत्री डॉ. रमन सिंह ह आज जिला मुख्यालय राजनांदगांव के ममता नगर-मोतीपुर ल जोरइया रेल्वे अंडर ब्रिज के लोकार्पण करिन। ए अण्डर ब्रिज के निर्माण करीबन 13 करोड़ 99 लाख रूपिया के लागत ले करिन हे। ए रेल्वे अंडर ब्रिज के माध्यम ले मोतीपुर-बजरंगपुर-नवागांव सड़क सीधा जुर गए हे। ए सड़क म सीधा आवागमन के सुविधा अऊ रेल्वे फाटक म होवइया दिक्कत मन के समाधान बर शहरवासी मन ह मुख्यमंत्री डॉ. रमन सिंह के आभार घलोक व्यक्त करिन। ए अंडर ब्रिज के शुरू हो जाय ले डोंगरगढ़ माँ बम्लेश्वरी अउ भवानी माता मंदिर ढारा-करेला जवइया पदयात्रि मन ल घलोक अड़बड़ सहूलियत होही। संगेच रेल पटरीपार के क्षेत्र मन मोतीपुर, बजरंगपुर, नवागांव, बापूटोला, सुकुलदैहान, बरगाही, ढाबा कोति ले शहर अवइया-जवइया सैकड़ों मनखे मन ल आवागमन के बिना बाधा के सुविधा मिलही।
ममता नगर रोड म रेल पटरी के तरी ए अंडर ब्रिज के बन जाय ले शहर के श्रमिक बहुल इलाका मन के मनखे मन ल बरसो ले होवइया परेशानी मन ले निजात मिल गए हे। ये वाले अंडर ब्रिज 382 मीटर लंबा अऊ 6.8 मीटर चौडा़ हे। एखर मुहाटी म साढ़े 11 फीट ऊंचा लोहा के मजबूत गेट लगाए गए हे, ताकि ऊंचा वाहन ये मां प्रवेश मत कर सकय। ए अंडर ब्रिज के बन जाय ले अब मनखे मन ल मोतीपुर रेल्वे फाटक उपर जाम अउर रेलगाड़ी गुजरे म फाटक के खुले के लंबा इंतजार ले घलोक छुटकारा मिल गए हे। 
रेल फाटक म वाहन मन के लंबा लाईन लगे, तीर-तखार बाजार के सेती भारी भीड़ होए ले मोतीपुर ले शहर अवइया-जवइया मनखे मन ल बहुत परेशानी होत रहिस। लंबा समय तक फाटक खुले के इंतजार म खड़े कई वाहन सवार हड़बड़ी म अवैधानिक तरीका ले पटरी पार करे के कोसिस करत रहिन। जेखर ले दुर्घटनाएं होए के घलोक संभावना बने रहय। ए सबो समस्या मन ल ध्यान म रखके शहर वासी मन कोति ले लंबा समय ले ए अंडर ब्रिज के निर्माण के मांग करे जात रहिस हे। मुख्यमंत्री डॉ. रमन सिंह ह शहर वासी मन के ए समस्या ल गंभीरता ले लेत मोतीपुर-ममता नगर के बीच पटरी के तरी अंडर ब्रिज बनाए ल मंजूरी दे रहिन हे। ये अंडर ब्रिज मार्च 2015 ले बनना शुरू होइस, जेखर शुभारंभ आज होइस हे। 
लोकार्पण समारोह म लोकसभा सांसद श्री अभिषेक सिंह, राजनांदगांव के महापौर श्री मधुसूदन यादव, बीस सूत्रीय कार्यक्रम क्रियान्वयन समिति के उपाध्यक्ष श्री खूबचंद पारख, छत्‍तीसगढ़ राज्य भण्डार गृह निगम के अध्यक्ष श्री नीलू शर्मा, छत्‍तीसगढ़ उर्दू अकादमी के अध्यक्ष श्री अकरम कुरैशी, विधायक डोंगरगढ़ श्रीमती सरोजनी बंजारे, जिला सहकारी केन्द्रीय बैंक के अध्यक्ष श्री सचिन बघेल, राजगामी संपदा न्यास के अध्यक्ष श्री रमेश पटेल, राज्य महिला आयोग के सदस्य डॉ. लकीर मेश्राम, नगर निगम के सभापति श्री शिव वर्मा, पूर्व जिला पंचायत अध्यक्ष श्री भरत वर्मा, राजगामी  संपदा न्यास के पहिली अध्यक्ष श्री संतोष अग्रवाल संग बहुत अकन जन प्रतिनिधि, जिला प्रशासन, रेल्वे अउर सेतु निगम के अधिकारी अऊ बड़ संख्या म प्रबुद्ध नागरिक उपस्थित रहिन।

Post a Comment

0 Comments