मनरेगा म मिलीस राष्ट्रीय पुरस्कार : मुख्यमंत्री ह ग्राम पंचायत टेमरी ल दीस बधाई

रायपुर, 08 जुलाई 2017। मुख्यमंत्री डॉ. रमन सिंह ह काल रात इहां अपन निवास कार्यालय म दुर्ग जिला के ग्राम टेमरी (विकासखण्ड-पाटन) ले आए प्रतिनिधि मंडल ले मुलाकात करिन। उमन मनरेगा के तहत ग्राम पंचायत टेमरी ल राष्ट्रीय पुरस्कार मिले म उहां के पंचायत प्रतिनिधि मन अऊ गांव वाले मन ल बधाई दीन। पूर्व संसदीय सचिव श्री विजय बघेल के नेतृत्व म आए प्रतिनिधि मंडल म जनपद पंचायत पाटन के उपाध्यक्ष श्री खेमलाल देशलहरा, ग्राम पंचायत टेमरी के सरपंच श्रीमती चंद्रिका देशलहरा अऊ टेमरी पंचायत के बहुत अकन पंच अउर कई ग्रामीण सामिल रहिन। 
आप मन ल बता दन कि केन्द्रीय पंचायत अऊ ग्रामीण विकास मंत्रालय कोति ले ग्राम पंचायत टेमरी ल पाछू महीना के 19 तारीक को नई दिल्ली म आयोजित समारोह म ए पुरस्कार ले सम्मानित करे गए रहिस। केन्द्रीय पंचायत अऊ ग्रामीण विकास मंत्री श्री नरेन्द्र सिंह तोमर के हाथ अपन ग्राम पंचायत बर ये वाले पुरस्कार सरपंच श्रीमती चंद्रिका देशलहरा ह ग्रहण करे रहिन। ये पुरस्कार साल 2015-16 के बेरा म टेमरी ग्राम पंचायत म मनरेगा के तहत होए सराहनीय विकास काम मन बर प्रदान करे गीस। खारून नदी के तीर ए ग्राम पंचायत म मनरेगा के तहत 100 काम दिवस पूरा करइया परिवार मन के संख्या 189 हे। ग्राम पंचायत म साल 2015-16 म 270 परिवार मन ल मनरेगा के तहत 36 हजार 253 दिन के रोजगार दे गीस। एमां ले 19 हजार ले जादा मानव दिवस के रोजगार महिला मन ल मिलीस। स्वच्छ भारत अभियान के तहत ए ग्राम पंचायत के 270 घर मन म ले 261 घर मन म शौचालय के निर्माण करे जा चुके हे।

Post a Comment

0 Comments