मुख्यमंत्री डॉ. रमन सिंह के अध्यक्षता म जगदलपुर रावघाट रेल्वे लाईन निर्माण बर होइस अनुबंध


  • इरकॉन करही 140 किलोमीटर रेल्वे लाईन के निर्माण

रायपुर, 19 जुलाई 2017। मुख्यमंत्री डॉ. रमन सिंह के अध्यक्षता म आज संझा इहां ऊंखर निवास कार्यालय म आयोजित बैठक म बस्तर रेल्वे प्राइवेट लिमिटेड अऊ इरकॉन कम्पनी के बीच अनुबंध उपर हस्ताक्षर करे गीस। ए अनुबंध के तहत जगदलपुर अऊ रावघाट के बीच इरकॉन कम्पनी कोति ले 140 किलोमीटर रेल्वे लाईन के निर्माण करे जाही, जेमां तेरा स्टेशन होही। ए रेल कॉरीडोर प्रोजेक्ट के लागत करीबन 2538 करोड़ रूपिया होही। अनुबंध म बस्तर रेल्वे प्राईवेट लिमिटेड के चेयरमेन डॉ. टी.आर.के. राव अऊ इरकॉन कंपनी के कार्यपालिक निदेशक श्री एस.एल. गुप्ता ह हस्ताक्षर करिन। अधिकारी मन ह बैठक म बताइन कि ए रेल कारीडोर के पहिली चरण बर भू-अर्जन के प्रक्रिया शुरू हो गए हे। वन जमीन व्यपवर्तन के प्रकरण ए महिना के आखरी तक तैयार कर लिए जाही। ए कॉरीडोर म बस्तर अऊ कोण्डागांव जिला मन के अंतर्गत अवइया 101 किलोमीटर के प्रस्तावित जमीन के विवरण रेल मंत्रालय ह राजपत्र म प्रकाशन बर भेज देहे हे। मुख्यमंत्री ह अनुबंध म खुशी जाहिर करत शुभकामना दीन। उमन अधिकारी मन ल भू-अर्जन अऊ वन जमीन के व्यपवर्तन के प्रक्रिया तीन महिना के भीतर पूरा करे अऊ निर्माण काम जनवरी 2018 तक शुरू करे के निर्देश दीन। ए अवसर म बस्तर रेल्वे प्राईवेट लिमिटेड के चिनहा चिन्ह (लोगो) के विमोचन करिन। कार्यक्रम म खनिज साधन विभाग के सचिव श्री सुबोध कुमार सिंह, छत्तीसगढ़ खनिज विकास निगम के प्रबंध संचालक श्रीमती अलरमंगई डी, बस्तर रेल्वे प्राईवेट लिमिटेड के मुख्य कार्य पालन अधिकारी श्री वी.एस. प्रभाकर अऊ भारतीय इस्पात प्राधिकरण (सेल) के अधिकारी घलोक उपस्थित रहिन।

Post a Comment

0 Comments