राजधानी म अवईया महिना बड़का सहकारिता सम्मेलन : मुख्यमंत्री डॉ. रमन सिंह करहीं शुभारंभ

तैयारी बैठक म राज्य स्तरीय आयोजन समिति के गठन
रायपुर, 29 जुलाई 2017। सहकारिता आंदोलन ल अऊ जादा मजबूत बनाए बर अवईया महिना अगस्त के आखरी हफ्ता म राजधानी रायपुर म राज्य स्तरीय सहकारिता सम्मेलन के आयोजन करे जाही। सम्मेलन के तैयारी अऊ ओखर स्वरूप तय करे बर आज इहां सिविल लाईन स्थित नवीन थिरावन भवन के सभाकक्ष म सहकारी संस्था मन के पदाधिकारी मन के बैठक आयोजित करे गइस। बैठक के अध्यक्षता राज्य सहकारी विपणन संघ (मार्कफेड) के अध्यक्ष श्री राधाकृष्ण गुप्ता ह करिस। सम्मेलन के शुभारंभ बर मुख्यमंत्री डॉ. रमन सिंह ल मुख्य अतिथि के रूप म आमंत्रित करे के निर्णय आज के बैठक म ले गीस। सम्मेलन के अध्यक्षता सहकारिता मंत्री श्री दयालदास बघेल करहीं। सम्मेलन इहां बूढ़ातालाब के आघू इंडोर स्टेडियम म करे जाही।
आयोजन के तैयारी बैठक म छत्तीसगढ़ राज्य सहकारी संघ के अध्यक्ष श्री लखन लाल साहू ह बताइन कि सहकारिता सम्मेलन म प्रदेश के सबो एक हजार 333 प्राथमिक कृषि साख सहकारी समिति मन अऊ 900 ले जादा छोटे वनोपज सहकारी समिति मन के प्रतिनिधि मन ल नेवता दे जाही। ऊंखर अलावा सहकारी विपणन संस्था मन के प्रतिनिधि घलोक सम्मेलन म सामिल होहीं। प्रस्तावित सम्मेलन म प्रधानमंत्री श्री नरेन्द्र मोदी के आव्हान म साल 2022 तक किसान मन के आमदनी दुगुना करे के दिशा म सहकारी संस्था मन के योगदान म घलोक चर्चा करे जाही। सम्मेलन म किसान मन ल खेती के उन्नत तौर-तरीका मन के संगें-संग पशुपालन, डेयरी विकास, जैविक खेती, पशुचारा उत्पादन, तेन्दूपत्ता संग्राहक मन बर संचालित कल्याणकारी योजना मन के जानकारी दे जाही। सहकारी संस्था मन के संचालन के समय होवइया व्यावहारिक दिक्कत मन उपर घलोक चर्चा होही। 
बैठक म सम्मेलन के सफल संचालन बर राज्य स्तरीय आयोजन समिति के घलोक गठन करे गीस। छत्तीसगढ़ राज्य सहकारी संघ के अध्यक्ष श्री लखनलाल साहू ल आयोजन समिति म अध्यक्ष के जिम्मेदारी दे गइस। ऊंखर संग राज्य सहकारी विपणन संघ (मार्कफेड) के अध्यक्ष श्री राधाकृष्ण गुप्ता, राज्य लघुवनोपज सहकारी संघ के अध्यक्ष श्री भरत साय, लोकसभा सांसद अउ जिला सहकारी केन्द्रीय बैंक जगदलपुर के अध्यक्ष श्री दिनेश कश्यप, मार्कफेड के वरिष्ठ उपाध्यक्ष श्री शशिकांत द्विवेदी, संग बिलासपुर के श्री प्रवीण दुबे, अम्बिकापुर के श्री अखिलेश सोनी, बैकुण्ठपुर (कोरिया) के श्री कृष्ण बिहारी जायसवाल, जगदलपुर के श्री रंजीत पाण्डेय अऊ श्री शेषनारायण तिवारी, राजनांदगांव के श्री सचिन बघेल, जिला सहकारी संघ बालोद के अध्यक्ष श्री झुनमुन गुप्ता, मार्कफेड के कनिष्ठ उपाध्यक्ष श्रीमती हेमलता परते, जिला सहकारी केन्द्रीय बैंक रायपुर के प्राधिकारी श्री योगेश चंद्राकर अऊ ल आयोजन समिति म सामिल करे गीस। 
सम्मेलन के तैयारी बैठक म राज्य सहकारी संघ (मार्कफेड) के वरिष्ठ उपाध्यक्ष श्री शशिकांत द्विवेदी, कनिष्ठ उपाध्यक्ष श्रीमती हेमलता परते, मार्कफेड संचालक मंडल के सदस्य श्री केदार गुप्ता, श्री तीर्थमोहन यादव, सचिव श्री यू.वी.एस. राठिया, बालोद जिला सहकारी संघ के अध्यक्ष श्री झुनमुन गुप्ता अऊ कई ठन सहकारी संस्था मन के प्रतिनिधि उपस्थित रहिन।

Post a Comment

0 Comments