मुख्यमंत्री ह स्वर्गीय डॉ. खूबचंद बघेल के जयंती म जनता ल दीन बधाई अऊ शुभकामना

रायपुर, 19 जुलाई 2017। मुख्यमंत्री डॉ. रमन सिंह ह आज 19 जुलाई के दिन स्वतंत्रता संग्राम सेनानी, साहित्यकार अऊ छत्तीसगढ़ राज्य निर्माण आंदोलन के अग्रणी नेता स्वर्गीय डॉ. खूबचद बघेल के जयंती के अवसर म जनता ल हार्दिक बधाई अऊ शुभकामना देहे हें। डॉ. रमन सिंह ह काली इहां जारी बधाई संदेश म कहें हे कि राज्य निर्माण बर जनमत निर्माण म स्वर्गीय डॉ. बघेल के ऐतिहासिक भूमिका ल हर-हमेशा याद रखे जाही। छत्तीसगढ़ सरकार ह ऊंखर ए योगदान खातिर सम्मान प्रकट करे बर उंखर स्मृति म किसान मन बर कृषक रत्न पुरस्कार के स्थापना करे हे। मुख्यमंत्री ह कहिन कि स्वर्गीय डॉ. बघेल छत्तीसगढ़ के लोकप्रिय किसान नेता अऊ समाजसेवी रहिन। उमन अपन लम्बा सार्वजनिक जीवन म हमेशा गांव, गरीब अउ किसान मन के हित के रक्षा बर समर्पित होके काम करिन। स्वर्गीय डॉ. बघेल ह राज्यसभा सांसद अऊ धरसींवा क्षेत्र के विधायक के रूप म घलोक जनता ल अपन मूल्यवान सेवा दीन। राष्ट्रपिता महात्मा गांधी के आव्हान म अगस्त 1942 म अंग्रेज मन के खिलाफ ‘भारत छोड़ो आंदोलन’ म घलोक डॉ. खूबचंद बघेल सामिल रहिन अऊ ए आंदोलन के कारन वो गिरफ्तार होइन अऊ करीबन ढाई साल तक जेल म घलोक रहिन। मुख्यमंत्री ह कहिन कि स्वर्गीय डॉ. बघेल जइसन तपस्वी नेता सही म भारत माता अऊ छत्तीसगढ़ महतारी के अनमोल रत्न रहिस।

Post a Comment

0 Comments