पर्यटन ल बढ़ावा देहे जमो उदीम होही: श्री दयाल दास बघेल

पर्यटन मंत्री ह फटफटी चलाके बढा़इस जवान मन के उछाह 
रायपुर, 08 जुलाई 2017। पर्यटन मंत्री श्री दयाल दास बघेल ह कहिन हे कि राज्य म पर्यटन के अड़बड़ संभावना हे। शासन कोति ले जमो उदीम पर्यटन ल बढ़ावा दे बर करे जात हे। श्री बघेल ह आज इहां मंहत घासीदास संग्रहालय परिसर म छत्तीसगढ़ पर्यटन मण्डल के सूचना केन्द्र ले बाईक रैली शुरू होए के पहिली कार्यक्रम ल संबोधित करिन। उमन बताइन कि राज्य के चार जलाशय- गंगरेल बांध, कोडार बांध, समोदा बैराज अऊ हसदेव बांगो बांध म वाटर स्पोट्स अऊ साहसिक खेल गतिविधि मन ल बढ़ाए जात हे। श्री बघेल ह ए अवसर म कहिन कि राज्य म युवा मन ल एडवेंचर पर्यटन के क्षेत्र म आकर्षित करे बर रायपुर ले सरोदा दादर (चिल्फी घाटी) व्हाया रानीधारा तक बुलेट बाईक रैली के आयोजन करे हे। एकर आयोजन छत्तीसगढ़ पर्यटन मण्डल कोति ले सिक्सथ गियर राइडर क्लब रायपुर के सहयोग ले करे गए हे। ए बाईक रैली म 45 युवा हिस्सा लेवत हे। 
छत्तीसगढ़ पर्यटन मण्डल के उपाध्यक्ष श्री केदार नाथ गुप्ता ह झण्डी देखा के फटफटी रैली के शुभारंभ करिस। पर्यटन मंत्री श्री बघेल ह युवा मन के संग खुदे फटफटी चलाके उंखर उत्साह बढ़ाइन। श्री बघेल ह घासीदास संग्रहालय परिसर ले शंकर नगर अंवती बाई चौक तक फटफटी चालाइन अऊ इहां ले रैली ल सरोदा दादर चिल्फी घाटी बर रवाना करिन। रैली के शुभारंभ स्थल म पर्यटन मण्डल के सदस्य श्री मोहन उपारकर, श्री प्रताप पारख, मण्डल के प्रबंध संचालक श्री एम.टी. नंदी संग मण्डल के आन अधिकारी-कर्मचारी उपस्थित रहिन।

Post a Comment

0 Comments