संस्कार अभियान ले लइका शिक्षा के संग संस्कार घलोक प्राप्त करहीं: रमशीला साहू

संस्कार अभियान लागू करे बर सघन प्रशिक्षण के समापन
रायपुर, 31 जुलाई 2017। महिला अउ बाल विकास मंत्री श्रीमती रमशीला साहू ह आज इहां जोरा स्थित पंजाब केसरी भवन म संस्कार अभियान ल सार्थक बनाए, प्रांरभिक बाल्यावस्था देखरेख अउ शिक्षा ल प्रदेश म लागू करे बर विभाग कोति ले चलाए जात सघन प्रशिक्षण कार्यक्रम के समापन सत्र म प्रशिक्षार्थी मन ल संबोधित करे गीस। उमन कहिन कि संस्कार अभियान ले लइका शिक्षा के संग संस्कार घलोक प्राप्त करही। आंगनबाड़ी केन्द्र मन म लइका मन ल प्रेम, दुलार देकर खेल-खेल म संस्कार व शाला पूर्व शिक्षा घलोक देवव तभे ए प्रशिक्षण के सार्थकता होही। प्रशिक्षण के समय मिले जानकारी मन ल केन्द्र मन म जाके अच्छा से क्रियान्वित करव। श्रीमती साहू ह प्रशिक्षार्थि मन ल प्रमाण पत्र घलोक दीन। 
आप मन जानतेच हव कि संस्कार अभियान के तहत आंगनबाड़ी केन्द्र मन म लइका मन ल शाला पूर्व शिक्षा के संगें-संग संस्कार खेल-खेल म देहे जाय के प्रावधान हे। 10 मार्च 2017 के दिन संस्कार अभियान ल चालू मुख्यमंत्री डॉ. रमन सिंह ह करे रहिन। अभियान ल सुचारू रूप ले चलाय बर पाठ्यक्रम निरधारित करे गए हे। पाठ्यक्रम चालू करे ले पहिली प्रशिक्षण जरूरी हे, ए खातिर विभाग कोति ले पाछू 25 मई ले प्रदेश भर के जिला कार्यक्रम अधिकारी मन, परियोजना अधिकारी मन अऊ पर्यवेक्षक अउ ट्रेनिंग सेंटर के संकाय सदस्य मन ल प्रशिक्षण देहे जात हे। अब तक 15 सौ ले जादा मनखे मन ल प्रशिक्षण दिए जा चुके हे। प्रशिक्षण पाए के बाद ये प्रतिभागी दू आंगनबाड़ी केन्द्र मन म जाके इहां ले जऊन गतिविधि सीखिन, वो लइका मन ल सीखाहीं। संगेच ये आंगनबाड़ी कार्यकर्ता मन ल प्रशिक्षण घलोक दिहीं। आंगनबाड़ी कार्यकर्ता मन के प्रशिक्षण के बाद संस्कार अभियान के पाठ्यक्रम ल पूरा प्रदेश के आंगनबाड़ी केन्द्र मन म लागू करे जाही।
ए अवसर म प्रशिक्षार्थि मन ल संबोधित करत विभाग के सचिव डॉ. एम. गीता ह कहिन कि ये हमार बर गरब के बात ये कि संस्कार अभियान म छत्तीसगढ़ पूरा देश म पहिली स्थान म हे। आंगनबाड़ी केन्द्र मन म लइका मन के उपस्थिति बढ़ही त हमर प्रशिक्षण सार्थक होही। ए अवसर म विभाग के वरिष्ठ अधिकारी मन उपस्थित रहिन। 

Post a Comment

0 Comments