मुख्यमंत्री डॉ. रमन सिंह ह नवा राष्ट्रपति श्री कोविंद ल दीन बधाई

रायपुर, 25 जुलाई 2017।  छत्तीसगढ़ के मुख्यमंत्री डॉ.रमन सिंह ह देश के नवा राष्ट्रपति श्री रामनाथ कोविंद ल हार्दिक बधाई देहे हें। डॉ. सिंह ह श्री कोविंद के आज नई दिल्ली म शपथ ग्रहण म प्रसन्नता व्यक्त करिन अऊ राष्ट्रपति के रूप म ऊंखर यशस्वी कार्यकाल बर अपन शुभेच्छा प्रकट करिन। मुख्यमंत्री ह कहिन - सादगीपूर्ण जीवन शैली म रचे-बसे, सहज-सरल स्वभाव के श्री कोविंद ह अपन सार्वजनिक जीवन म दलित-शोषित समाज के उत्थान बर महत्वपूर्ण योगदान देहे हें। जीवन के कठिन संघर्ष मन के आंच म तपके ओ मन आज देश के सर्वोच्च पद ल सुशोभित करत हें। डॉ. रमन सिहं ह कहिन- हम सबो बर ये गरब के बात हे कि छत्तीसगढ़ के संग श्री कोविंद के आत्मीय अऊ भावनात्मक संबंध रहे हे। 
बिहार के राज्यपाल के रूप म करीबन तीन महीना पहिली चार मई के दिन उंखर छत्तीसगढ़ आगमन होय रहिस। उमन राज्य सरकार के हमर छत्तीसगढ़ योजना के तहत नवा रायपुर म बिलासपुर, मुंगेली, जांजगीर-चांपा, कबीरधाम अऊ कोरबा जिला के लगभग पांच सौ पंच-सरपंच मन ले मुलाकात करे रहिन। श्री कोविंद ह हमर छत्तीसगढ़ योजना के तारीफ करत कहे रहिन कि ये पंचायत प्रतिनिधि मन के बीच आपसी मेल-जोल अऊ छत्तीसगढ़ के विकास ल देखे बर अध्ययन के एक अनोखा यात्रा हे। श्री कोविंद ह ये घलोक कहे रहिन कि ए योजना के माध्यम ले छत्तीसगढ़ सरकार ग्रामीण जनप्रतिनिधि मन ल राज्य के विकास ल नजदीक ले देखे के मौका देवत हे। दुसरइया पइत श्री कोविंद ए महीना के 09 तारीक के दिन रायपुर आए रहिन अऊ हम सब मन उंखर आत्मीय स्वागत करे रहेन। डॉ. सिंह ह श्री कोविंद के स्वस्थ, सुदीर्घ अऊ यशस्वी जीवन के कामना करे हें।


Post a Comment

0 Comments