मुख्यमंत्री तीर्थयात्रा योजना : प्रदेश के 950 वरिष्ठ नागरिक तीर्थयात्रा बर रवाना

समाज कल्याण मंत्री श्रीमती रमशीला साहू ह विशेष ट्रेन ल देखाईस हरियर झंडा 

रायपुर, 04 जुलाई 2017। समाज कल्याण मंत्री श्रीमती रमशीला साहू ह आज इहां रेल्वे स्टेशन के प्लेटफार्म क्रमांक-2 म विशेष ट्रेन ल हरियर झण्डा देखाके मुख्यमंत्री तीर्थयात्रा योजना के तहत 950 वरिष्ठ नागरिक मन ल प्रयाग, काशी, विश्वनाथ के यात्रा बर रवाना करिन। उमन ट्रेन के डब्बा मन म तीर्थ यात्री मन के बीच पहुंच के उंखर मंगलमय यात्रा बर अपन शुभकामना दीन। ए तीर्थ यात्री मन म दंतेवाड़ा, सुकमा, बीजापुर, बस्तर जिला के 950 वरिष्ठ नागरिक सामिल हें। तीर्थ यात्री आठ जुलाई तक वापस लहुट आहीं। 
विभाग के सचिव श्री सोनमणि बोरा ह ए अवसर म बताइन कि अगले पइत ले मुख्यमंत्री तीर्थ यात्रा योजना के अंतर्गत अस्थि विसर्जन बर प्रयाग जवइया गरीब कुटुंब के अइसन मनखे मन ल सामिल करे जाही, जऊन गरीबी के सेती अस विसर्जन बर जा नइ पावंय। कम से कम पन्द्रा सीट कुटुंब के मनखे मन बर आरक्षित करे जाही। उल्लेखनीय हे कि मुख्यमंत्री तीर्थयात्रा योजना समाज कल्याण विभाग के महत्वपूर्ण योजना हे। योजना के तहत राज्य के वरिष्ठ नागरिक मन ल ऊंखर जीवन काल म एक पइत प्रदेश के बाहिर स्थित कई ठन तीर्थ स्थान मन म ले कोनो एक या एक ले जादा स्थान मन के निःशुल्क यात्रा कराए जाथे। अब तक एक लाख 90 हजार 747 मनखे मन ल ए योजना के तहत तीर्थ स्थान मन के निःशुल्क यात्रा कराए गए हे। 

Post a Comment

0 Comments