2 अगस्‍त - पंडित रविशंकर शुक्ल के जयंती : मुख्यमंत्री डॉ. रमन सिंह ह दीन शुभकामना

रायपुर, 01 अगस्त 2017। छत्तीसगढ़ के मुख्यमंत्री डॉ. रमन सिंह ह काल दू अगस्त के दिन स्वतंत्रता संग्राम सेनानी अऊ तत्कालीन अविभाजित मध्यप्रदेश के पहिली मुख्यमंत्री स्व. पंडित रविशंकर शुक्ल के जयंती म जनता ल हार्दिक बधाई अऊ शुभकामना देहे हें। डॉ. सिंह ह पंडित शुक्ल के जयंती के पूर्व संध्या म आज इहां जारी शुभकामना संदेश म कहे हें कि पंडित रविशंकर शुक्ल के जन्म मध्यप्रदेश के सागर जिला म होए रहिस, फेर हम सब बर ये गरब के बात हे कि उमन छत्तीसगढ़ ल कर्मभूमि बनाके भारतीय स्वतंत्रता संग्राम के नेतृत्व करिन। उमन साल 1902 म तत्कालीन खैरागढ़ रियासत म प्रधान अध्यापक के रूप म घलोक अपन सेवा दीन। उंखर हाईस्कूल के शिक्षा रायपुर म अऊ उच्‍च शिक्षा जबलपुर अऊ नागपुर म होइस। 
डॉ. रमन सिंह ह कहिन -स्व. पंडित रविशंकर शुक्ल एक सुयोग्य अध्यापक, कुशल प्रशासक, अच्छा वक्ता, लेखक, गंभीर, चिंतक, वकील अऊ पत्रकार घलोक रहिन। साल 1942 म अंगरेजी हुकूमत के खिलाफ राष्ट्रपिता महात्मा गांधी के आव्हान म भारत छोड़ो आंदोलन के उमन छत्तीसगढ़ म कुशल नेतृत्व करिन। डॉ. रमन सिंह ह कहिन -आजादी के बाद 15 अगस्त 1947 ले 31 अकटूबर 1956 तक तत्कालीन सीपी एण्ड बरार प्रांत के पहिली मुख्यमंत्री अऊ राज्य मन के पुनर्गठन के बाद एक नवम्बर 1956 ले 31 दिसम्बर 1956 तक नवा मध्यप्रदेश के पहिली मुख्यमंत्री के रूप म जनता के बेहतरी बर पंडित शुक्ल के काम मन ल आज तक सम्मान के संग याद करे जाथे। आजादी के बाद लौह पुरूष सरदार वल्लभ भाई पटेल के नेतृत्व म पंडित शुक्ल ह देशी रियासत मन के भारत संघ म विलय म घलोक सराहनीय सहयोग दीन। 
डॉ. सिंह ह कहिन -छत्तीसगढ़ म भिलाई इस्पात संयंत्र के स्थापना बर पंडित रविशंकर शुक्ल ह केन्द्र के स्तर म पहल करे म महत्वपूर्ण भूमिका निभाए रहिन। रायपुर शहर म संस्कृत महाविद्यालय, आयुर्वेद कॉलेज, विज्ञान अऊ इंजीनियरिंग कॉलेज के स्थापना घलोक उंखर प्रेरणा ले होइस। छत्तीसगढ़ सरकार ह राज्य अऊ देश के विकास म ऊंखर ऐतिहासिक योगदान के प्रति सम्मान प्रकट करे बर उंखर स्मृति म पंडित रविशंकर शुक्ल अलंकरण के स्थापना करे हे। ये अलंकरण सामाजिक, आर्थिक अऊ शैक्षणिक क्षेत्र म सराहनीय भूमिका निभइया मनखे या संस्था के चयन करके ओ मन ल हर साल छत्तीसगढ़ राज्य स्थापना दिवस ’राज्योत्सव’ के अवसर म प्रदान करे जाथे। पंडित रविशंकर शुक्ल के जन्म दू अगस्त 1877 को मध्यप्रदेश के सागर जिला म होय रहिस। पहिली मुख्यमंत्री के रूप म तत्कालीन मध्यप्रदेश सरकार के नेतृत्व करत उंखर निधन 31 दिसम्बर 1956 को दिल्ली म हो गीस।

Post a Comment

0 Comments