पहाड़ी कोरवा अउ बिरहोर वाले गांव मन म महामारी अऊ आन मौसमी बीमारी मन के रोकथाम बर विशेष शिविर

घोरडेगा अऊ धनापाठ म तीन अगस्त ले करीबन दो महिना तक चलही स्वास्थ्य शिविर

रायपुर, 03 अगस्त 2017। स्वास्थ्य अऊ कुटुंब कल्याण विभाग कोति ले पहाड़ी कोरवा अऊ बिरहोर मन जिहां जादा रहिथें उन गांव मन म महामारी अउ आन मौसमी बीमारी मन के रोकथाम बर तीन अगस्त ले चार अक्‍टूबर तक करीबन दू महीना तक विशेष शिविर लगाए जात हे। ये शिविर जशपुर जिला के विकासखंड बगीचा के ग्राम घोरडेगा अऊ धनापाठ म शुरू हो गए हे।
स्वास्थ्य विभाग के अधिकारी मन ह आज बताइन कि पहाड़ी कोरवा क्षेत्र के विशेष पिछड़ा जनजाति मन बर लगाए जात स्वास्थ्य शिविर मन के संख्या जरूरत के अतानुसार बढ़ाए जा सकत हे। उमन बताइन कि शिविर म ग्रामीण चिकित्सा सहायक, मेडिकल टीम आदि के ड्यूटी लगाए गए हे। मेडिकल टीम कोति ले उन्‍हें रहिके चिकित्सा सुविधा देहे जात हे। शिविर म एक टीम के ड्यूटी पूरा होतेच दुसर टीम ड्यूटी म तैनात होही। शिविर म ग्रामीण चिकित्सा सहायक, प्राथमिक स्वास्थ्य केन्द्र लोदाम, मनोरा, पत्थलगांव, फरसाबहार, बटईकेला, कुनकुरी के चिकित्सक मन के ड्यूटी लगाए गए हे। आप मन जानतेच होहू कि बरसात के दिन म होवइया महामारी अउ मौसमी बीमारी मन ल ध्यान म रखत पहिलिच ले स्वास्थ्य शिविर लगाइए गए हे। शिविर मन म गांव वाले मन ल स्वच्छता अऊ मौसमी बीमारी ले बचे के बारे म घलोक बताइए जात हे।  

Post a Comment

0 Comments